Музей үлэһиттэрэ Агафангел Иванович туһунан матырыйааллары хомуйа сылдьан аҕыйах хонуктааҕыта биллибэт киһи бюһун буллулар. Бюһу ыаллыы олорбут И.Н. Елисеев-Усхаан А.И. Лукин олоро сылдьыбыт дьиэтин хоспоҕуттан булан уурбут, харайбыт эбит. Агафангел Иванович оҥорбут бюстарын испииһэгэр суох, онон бүтэһик үлэлэриттэн буолуон сөп диэн сабаҕалыыллар. Бу киһини (хаартыскаҕа) билэр дьон, эбэтэр аймахтара, уруулара баар буоллаххытына Намнааҕы П.И. Сивцев аатынан история уонна этнография музейыгар биллэрэргитигэр көрдөһөллөр (телефон - 8-411-62-42-6-88).

Кыраайы үөрэтээччи, музей үлэһитэ Иннокентий Кривошапкин А.И. Лукин туһунан бу курдук кэпсээтэ: «Агафангел Иванович 1914 с. сэтинньи 17 күнүгэр Бөтүҥ нэһилиэгэр төрөөбүт. Куорат аҕыс кылаастаах оскуолатын бүтэрэн баран култьпросветучилищеҕа үөрэммит. Үөрэҕин бүтэрэн баран Ньурба театрыгар худуоһунньугунан ананан үлэлии сылдьан, 1942 с. Сэбиэскэй Армия кэккэтигэр ыҥырыллан II Украинскай, I Беларусскай фроннар чаастарыгар сулууспалаабыт. Аҕа дойду Улуу сэриитин 2-с степеннээх орденынан, «За взятие Кенигсберга», «Германияны кыайыы иһин» диэн мэтээллэринэн, Гомель уонна Бобруйскай куораттары босхолооһун иһин Верховнай Кылаабынай командующай махтал суруктарынан наҕараадаламмыт.

1952 сыллаахха скульптураҕа холонон көрбүт. Аан бастаан покровскайдарга Серго Орджоникидзе пааматынньыгын оҥорбут эбит. Салгыы М.Н. Жирков, П.П. Романов, М.К. Аммосов уо.д.а. скульптураларын оҥортоон, дьон сэҥээриитин ылбыт. Агафангел Иванович төрөөбүт улууһугар, үүнэр көлүөнэҕэ өйдүү-саныы сылдьалларыгар анаан Советскай былаас туругурарын туһугар гражданскай сэриигэ, Аҕа дойдуну көмүскүүр Улуу сэриигэ тыыннарын толук уурбут буойуннар сырдык ааттарын үйэтитэн Бөтүҥҥэ, 1 Хомустаахха, Арбыҥҥа, Аппааныга, Үөдэйгэ, Хамаҕаттаҕа, Түбэҕэ, 2 Хомустаахха, Хатырыкка уонна Намҥа пааматынньыктары, бюстары оҥортообут. Маны таһынан, Сунтаар, Булуҥ, Ньурба, Үөһээ Бүлүү, Бүлүү, Чурапчы, Таатта, Уус-Алдан, Мэҥэ-Хаҥалас улуустарыттан, Дьокуускай куораттан, Нам нэһилиэктэриттэн кэлэн фронтовиктарга анаан киһи уҥуоҕар туруоруллар бюстары сакаастаан оҥоттороллор эбит».