Бэҕэһээ киэһэ 20:20 бу туһунан иһитиннэрии дьуһуурунай чааска киирбит. Учаастактааҕы полиция үлэһитэ, старшай лейтенант Петр Горохов  уонна полиция сержана  Иван Сарафанов быһылаан буолбут сиригэр суһаллык тиийбиттэр.

"Полиция үлэһиттэрэ төһө кыалларынан ууга түһэн эрээччигэ чугаһаабыттар уонна кууркаларын баайаннар киниэхэ биэрэннэр быыһыы сатаабыттар. Бииргэ үлэлиир дьоннорун ыҥырбыттар уонна быа илдьэ кэлэллэригэр эппиттэр. Полиция сержана Михаил Васильев  уонна полиция старшай прапорщига  Амбросий Гуринов көмөҕө кэлбиттэр. Гуринов быаны бэйэтигэр эринэн барын ууга түһэн эрэр киһиэхэ чараас мууһунан сыыллыбыт. Тоҥон хамсаабат буолбут эр киһини кууркатын саҕатыттан харбаан мууска таһаарбыт. Ол кэнниттэн иккиэннэрин полиция үлэһиттэрэ кытыыга соһон таһаарбыттар", - диэн биэдэмистибэ пресс-сулууспатыгар эттилэр.

Ууга түһэ сыспыт киһиэхэ кураанах таҥаһы кэтэрдибиттэр уонна оройуоннааҕы балыыһаҕа тиэрдибиттэр. Быһылаан буолар күнүгэр кэргэнниилэр уу баһа өрүскэ киирбиттэр. Ууну баһаары эр киһи ууга түспүт. Ол туһунан  кэргэнэ тыллаабыт.

СӨ-гэр Ис дьыала миниистирэ полиция хорсун үлэһиттэрин наҕараадалыаҕа.

Хаартыскаҕа: Киһи олоҕун быыһаабыт ИдьМ Сунтаар оройуонунааҕы отделын үлэһиттэрэ. Хаҥастан уҥа: старшай лейтенант Петр Горохов, старшай сержант Иван Сарафанов, старшай прапорщик Амбросий Гуринов уонна старшай сержант Михаил Васильев.