Музейга бастакы быраастар олохторун, үлэлэрин кэпсиир матырыйааллар, доруобуйа харыстабылыгар анаан тахсыбыт кинигэлэр, ыстатыйалар, брошюралар, араас кэмнэргэ туттуллубут медицинскэй тэриллэр, Улуу Кыайыы 70 сылыгар анаан сэрии иннинээҕи, сэрии кэминээҕи уонна сэрии кэннинээҕи сыллары кэпсиир стендэлэр бааллар.

Бу дьоһун музей үөрүүлээх аһыллыытыгар доруобуйа харыстабылыгар бэйэлэрин сыраларын ууран туран эҥкилэ суох үлэлээбит бэтэрээннэри, музей тэриллиитигэр күүс-көмө буолбут дьону ыҥыран сырытыннардылар. Ыалдьыттарга СР уонна РФ доруобуйатын харыстабылын туйгуна Вера Азарова музей экспонаттарын билиһиннэрдэ.

Бэтэрээннэр, ыҥырыылаах ыалдьыттар балыыһа үлэһиттэрин саҕалаабыт үлэлэрэ өссө сайда, кэҥии, хаҥыы, байа турарыгар бэйэлэрин ыллыктаах баҕа санааларын эттилэр уонна сэмэй бэлэхтэрин туттардылар. Нам улууһугар доруобуйа харыстабылын туһунан көлүөнэттэн көлүөнэҕэ кэпсии өйдөбүнньүк баар буолла.