Оттон бу күннэргэ үөрүүлээх даатаны бэлиэтээтилэр. Бэлиэ күҥҥэ СР доруобуйа харыстабылын министрэ Александр Горохов, «1 №-дээх республикатааҕы балыыһа – медицина национальнай киинэ” СР ГБТ генеральнай директораВалерий Петров, ЯРКВД кылаабынай бырааһа Сергей Петров, улууска медицина эйгэтигэр үлэлээбит, сыраларын уурбут дьон муһуннулар.

СИА корреспонденыгар Белай Гора бөһүөлэгин ОМР кылаабынай бырааһы солбуйааччы Елена Новиковаманнык кэпсээтэ:

- Балыыһабытыгар “Доруобуйа” нацбырайыагынан 2006-2007 сылларга электрокардиографтары, рентген-аппараты, доруобуйа харыстабылыгар модернизациянан ламинарнай камераны уонна 2,3 №-дээх лабораторнай комплекстары, компьютердары о.д.а. доруобуйаны чэбдигирдэргэ наадалаах тэриллэри ылбыппыт. Онон үлэ сыллата тупсан иһэр. Маны сэргэ, кэнники сылларга эдэр специалистар кэлэн эрэллэрэ үөрдэр. Быйыл психонарколог уонна терапевт быраастарданныбыт. Учаастактааҕы биэс балыыһаҕа терапевтардаахпыт. Билигин улуус киининээҕи балыыһабытыгар хапытаалынай өрөмүөн бара турар, сотору түмүктэниэхтээх.

Абыйдарга бэлиэ даатаҕа анаан оҥоһуллубут кинигэ улахан үөрүүнү бэлэхтээбит. Ол курдук, улууска медицина сайдыытын, историяны кэпсиир «Элгэс эмчиттэрэ – Абый аанньаллара» диэн кинигэ сүрэхтэниитигэр мустубут дьон-сэргэ кинигэни көрөн-истэн улаханнык сэргэхсийбиттэр, астыммыттар. Ону сэргэ Абый нэһилиэгэр кылаабынай бырааһы солбуйааччы С.В.Дохунаевка өр сыллаах кыһамньылаах үлэтин сыаналаан, үөрүүлээх быһыыга-майгыга СР үтүөлээх бырааһа үрдүк аат туттарыллыыта дохсун ытыс тыаһынан доҕуһуолламмыт.

Ыраахтан тиийбит ыалдьыттар улуус киининээҕи балыыһаҕа сылдьан үлэни-хамнаһы билсибиттэр. Онтон Абый бөһүөлэгэр буолбут СР Доруобуйа харыстабылын министерствотын коллегиятыгар нэһилиэнньэ доруобуйатын чэбдигирдии, тыа сиригэр саҥа балыыһаны тутуу, эдэр кадрдарынан хааччыллыы, о.д.а. боппуруостары тула сэргэх кэпсэтии буолбут.