Маныаха кини баар боломуочуйаны оройуон таһымыгар биэрэр наадатын ыйда.  "Нерюнгри оройуона бу боппуруоһу бэйэтин тус хонтуруолугар ылар уонна эми чэпчэтиинэн туһанааччыларга анаан атыылаһарга аукциону биллэрэр толору кыахтаах. Ити олоххо киирдэҕинэ эминэн хааччыйыы болдьоҕо биллэ кылгыах, маныаха үөскээбит уустук быһыы-майгы туоратыллыах этэ", - диэн баһылык этиитин түмүктээтэ.

Оройуон балыыһата эминэн хааччыйыыны бэйэтигэр ылар кыахтааҕын киин балыыһа кылаабынай бырааһа  Ньургун Степанов бигэргэттэ."Регионнааҕы боломуочуйа сороҕо оройуон таһымыгар бэриллиннэҕинэ, маны кэмигэр сөптөөхтүк быһаарыах этибит", - диэтэ кини.

Чэпчэтиинэн туһанар гражданнары эминэн хааччыйыы кыһалҕата үөскээбитэ хас да сыл буолбутун туһунан министрдэр кабинеттарын бэрэссэдээтэлэ Галина Данчикова эттэ уонна киирбит этиини ылынар ордугун бэлиэтээтэ. "Боппуруос миэстэтигэр көдьүүстээхтик быһаарыллар буоллаҕына, боломуочуйаны оройуон таһымыгар биэриэҕиҥ", - диэтэ бырабыыталыстыба бэрэссэдээтэлэ.

Ыарыыны эрдэттэн сэрэтэр уонна эмп тэрилтэлэригэр эдэр специалистар үлэлии кэлиилэрэ кэпсэтии киинигэр турда. Эдэр үлэһиттэр дьиэнэн-уотунан хааччыллыылара улахан кыһалҕаҕа кубулуйбут. Кинилэргэ олорор усулуобуйаны тэрийиигэ Нерюнгри оройуонун, Чульман уонна Серебряный Бор куорат дьаһалталарыгар тус сыаллаах бырагыраама ылыныллыбыт.

Бырагыраама бигэргэнэригэр, ситиһиилээхтик олоххо киирэригэр, баар кыһалҕа быһаарылларыгар доруобуйа харыстабылын боломуочуйата өрөспүүбүлүкэ таһымыттан оройуоҥҥа бэриллэрэ ордук. Оттон ити оройуон таһымыгар буолбакка, өссө 2012 сылтан ыла өрөспүүбүлүкэ быһаарыытыгар сылдьар.

"Бырагыраама бигэргэннэҕинэ, маны үбүлүүргэ олохтоох бюджекка үп-харчы көрүөхпүт", - диэтэ баһылык Андрей Фитисов.

Нерюнгри оройуонун баһылыга киллэрбит икки этиитигэр министрдэр кабинеттара сөбүлэстэ уонна Саха Өрөспүүбүлүкэтин бырабыыталыстыбатын уурааҕын бырайыагар киллэрдэ.