Онуоха предпринимательство уонна туризм министрэ Екатерина Кормилицына Өймөкөөн, Булуҥ уонна Эдьигээн улуустара инники күөҥҥэ иһэллэрин бэлиэтээбитэ. Кэрэхсэбиллээҕэ баар, кэлиҥҥи сылларга Өймөкөөн улууһугар туризм сайдыытыгар ыччаттар ылсан эрэллэр.

Быйыл саас буолан ааспыт "Тымныы полюһа - Өймөкөөн" кыһыҥҥы туризм фестивалын кэмигэр улуустааҕы култуура управлениетын салайааччы Аксиния Сивцева туризмы сайыннарыыга "төгүрүк остуолу" тэрийэн ыыппыта. Онно эдэр препринимателлэр бэйэлэрин бырайыактарын билиһиннэрбиттэрэ. Онно Томтор нэһилиэгиттэн Иван Заболоцкай бырайыагын билиһиннэриитин тыыммакка да олорон истибиппит. Бу олохтоох толкуйдаах, өйдөөх-санаалаах эдэр киһи төрөөбүт улууһугар туризмы сайыннарыыга бэйэтин торумун билиһиннэрбитэ.

 Кураанах дойҕох буолбатах

 Туох кистэлэ кэлиэй, туох да анал базата, матырыйаала, биир тылынан, туох да тирэҕэ суох кураанах дойҕоҕунан кумааҕыга эрэ "туризмы сайыннарар былаан" олус үгүс.

Ол да иһин буолуо, Иван Заболоцкай бэйэтин киирии тылын маннык саҕалаабыта мээнэҕэ буолбатаҕа биллэр:

-- 2006 сыллаахтан тутуу хайысхатыгар анаан ылсан үлэлиибин. 2009 сыллаахха предприниматель быһыытынан регистрацияламмытым Нэһилиэкпэр туризмы сайыннарыыга бэйэм кылааппын киллэрэн, дьиэм аттыгар 15 миэстэлээх гостиница тутан эрэбин. Бу толору хааччыллыылаах сыбаайаҕа турар киэҥ-куоҥ дьиэ, аттыгар массыына турар гаражтаах буолуоҕа. Быйыл сайын тутан бүтэрэр былааннаахпыт. Дьиэм уонна гостиница аттыгар 1960 сыллаахха тутуллубут уруккута "Радиоцентр" дэнэр дьиэни саҥардан оҕо маҕаһыына оҥоруом. Ол аттыгар оҕо оонньуур-сынньанар былаһааккатын тута сылдьабын. Маҕаһыыным биир хоһун "Үһүс саас киинэ" диэн ааттаан ыал эбэлэригэр аныаҕым. Манна кырдьаҕастар сиэннэрин кытта кэлэн сынньаныахтара, иллэҥ кэмнэригэр иис-ас куруһуогар дьарыктаныахтара. Ол эбэтэр, бу эҥэр элбэх функциялаах сынньанар комплекс буолуоҕа.

 Өймөкөөҥҥө -- туризм кластера

 Салгыы Иван сонун бырайыагын билиһиннэрбитэ:

- Томтор, Өймөкөөн, Сордоҥноох нэһилиэктэрин баһылыктарын кытта сүбэлэһэн баран, туризмҥа биһиги Өймөкөөммүтүн соҕотох Томтор эрэ нэһилиэгэ сирэйдээн көрдөрөрүн курдук буолбакка, кыһыҥҥы туризм фестивалыгар бары нэһилиэктэр кыттан, тыа сирин барытын туристическай кластерга киллэрэргэ сананныбыт. Ол эбэтэр Күбүмэттэн саҕалыыбыт. Чурапчыга, Тааттаҕа, Томпоҕо сылдьан иһэр туристар Күбүмэҕэ “чайнойга” тохтоон ааһыахтара. Бу бастакы тохтобул. Онно киһи кута-сүрэ тохтуур, турист ирдэбилин тутуһан, дьоҕус кафе тутарга былаанныыбыт.

Иккис тохтобул - Үчүгэй нэһилиэгэ. Манна турист эбээн норуотун олоҕун-дьаһаҕын кытта билсиэҕэ, табаҕа хатааһылыаҕа, үссэнэн ааһыаҕа. Онтон событийнай тур кыттыылаахтара тута Сордоҥнооххо тиийэн, муус аннынан балыктаан ааһыахтара, нэһилиэк туристарга аналлаах программатыгар кыттыыны ылыахтара. Ол кэннэ Өймөкөөҥҥө ааһаллар. Манна эмиэ хонон-өрөөн баран, Өймөкөөн нэһилиэгин турмаршруттарын кытта билсиэхтэрэ. Онтон Томторго "Көмүс күрүөҕэ" кэлэн, түмүктүүр туризм фестивала буолуоҕа. Быйыл ити былааммытын олоххо киллэрэн, боруобалаан көрдүбүт. Уонна табыллыыһы диэн санааҕа кэллибит. Сүрүнэ, нэһилиэктэринэн туристар маршруттарын олохтуохха уонна туристары түһэрэр инфраструктураны тобулуохха наада. Бу кластер фестиваль кэмигэр эрэ буолбакка, сылы быһа үлэлиирин ситиһиэхпит.

Бу күннэргэ Иван Заболоцкай бу ылыммыт соругун толороору бэйэтин биригээдэтин кытта гостиницатын тутан бүтэрэр соруктаах үлэ-хамнас үөһүгэр сылдьар.