Күрэхтэһии бэс ыйын ортотугар Стамбулга ыытыллар Европа чемпионатын иннинэ күүһү-кыаҕы көрүнүүнэн буолла. Манна Олимпийскай солбук училищетын иитиллээччитэ Герман Устинов 66 киилэлээхтэргэ иккис миэстэни ылан, бу ыйааһыҥҥа Россияҕа лидеринэн буоларын дакаастаата. Кини кыайыылааҕы быһаарар хапсыһыыга кадеттарга Европа, аан дойду чемпиона, обургу оҕолор Олимпийскай оонньууларын былырыыҥҥы кыайыылааҕа Теймур Маммадовка (Азербайджан) 2:3 ахсаанынан сабырыйтарда. Бу ыйааһыҥҥа тустубут Россия өссө биир бөҕөһө Марат Дедегкаев эрдэ туораабыта.

60 киилэҕэ диэри ыйааһыҥҥа тустубут Николай Охлопковпытыгар уонна Владислав Ефимовпытыгар эмиэ Азербайджан тустууга Али Рахимзаде ыарахан таһаҕас буолла. Бастаан кини Владиславы иккис эргииртэн туораппыта (1:4). Онтон Николайга үһүс миэстэ иһин киирсэр суолун бүөлүү турбута (11:13).

Россия уолаттарга сүүмэрдэммит хамаандатын старшай тренерэ Петр Юмшанов иһитиннэрбитинэн, Европа чемпионатыгар кимнээх тустуохтара бэс ыйын 15 күнүгэр диэри быһаарыаллыаҕа.