Театр саалаҕа ыҥырар чуораана чугдаарар. Дьон бары саалаҕа киирэр.

Театр сценатыгар улууканнаах режиссер Андрей Борисов аан дойду дьонун сирэйдээн көрдөрбүт, бары биир тыыга олорсон иһэрбитин санатан, дьоҥҥо-сэргэҕэ саҥа өйү-санааны сахпыт оҥочото долгуҥҥа күөрэйэр... Сотору кэминэн А.Борисов саҥалыы айбыт уобарастара – төрөөбүт норуоттарын кэрэ кэскилин, уйгулаах олохторун оҥкулун түстээбит Өксөкүлээх Өлөксөй, Былатыан Ойуунускай, Максим Аммосов, бырааттыы Ксенофонтовтар, Василий Никифоров-Күлүмнүүр, Василий Никифоров-Манньыаттаах уола баар буола түһэллэр. Кинилэри кэккэлэһэ Андрей Борисов турунар...

Россия народнай артыыһа, РФ искусствотын үтүөлээх деятелэ, ССРС уонна РФ Судаарыстыбаннай бириэмийэлэрин лауреата Андрей Борисов 24 сыл культура миниистиринэн үлэлээбит кэмнэригэр ытыктабыл бэлиэтигэр уонна кинини саҥа дуоһунаһыгар чиэстээһин итинник сценарийынан саҕаламмыта мээнэҕэ буолбатах.

Андрей Борисов кинини кытары биир санаанан салайтарбыт дьонугар, Сахатын театрын кэлэктиибигэр уонна көрөөччүлэргэ махтанан туран, кылгастык бэлиэ түгэннэргэ тохтоон ааста.

СӨ Судаарыстыбаннай Мунньаҕын (Ил Түмэн) бэрэссэдээтэлэ Александр Жирков Андрей Борисовы СӨ судаарыстыбаннай сүбэһитин дуоһунаһынан эҕэрдэлээтэ.

«Үйэлэргэ илдьэ кэлбит тутаах төрүттэрбит үрэллээри гыннылар диир дойду ыксаллаах кэмнэригэр сорох субъектар бэйэлэрин культураларыгар сатамньыта суохтук дьаһаммыттара. Оттон биһиги өрөспүүбүлүкэбит табыллыбыта. Саха сирин культуратын салайар сэрэбиэй, анал Андрей Саввичка түбэспитэ. Кинини талыы Саха сиригэр культура үйэ чиэппэригэр сайдыытын эрдэттэн быһаарбыта... Иккиһинэн, бу сылларга кини биһиги культурабыт туллар тутааҕын – Саха театрын иилээн-саҕалаан салайыыта улахан суолталаах. Андрей Борисов Саха театрын салайбыт бары кэмин саха культуратын «үрүҥ көмүс үйэнэн» ааттыахха сөп.

Андрей Саввич, өссө хас да уонунан сылларга бэйэҥ холобургунан, кэрэҕэ тардыһар күүскүнэн дьону көҕүлүү туруоҥ», – диэн истиҥ эҕэрдэтин тириэртэ.

М.Аммосов аатынан ХИФУ ректора Евгения Михайлова Андрей Саввиһы кытары бииргэ үлэлээбит кэмнэриттэн саха олоҥхотун киһи-аймах материальнайа суох шедевригэр киллэрбит кэмнэрин ахтан-санаан ааста.

Андрей Борисов дойду Президенэ Владимир Путин ыйбыт хайысхатынан “Саха сирин норуоттарын духуобунай сайдыытын парадигматын” былаанын оҥорбутун иһитиннэрдэ. Кини элбэх омуктаах, үгүс өрүттээх культура, норуоттар эйэлээхтик бииргэ үлэлээһиннэрэ Россияҕа саамай сыаналанарын тоһоҕолоон бэлиэтээтэ.

«Саҥа миниистиргитин харыстааҥ. Киниэхэ эбэтэр культура биллиилээх деятелигэр саба түһэр буоллахтарына, ол аата культура үрдүгэр түһэллэр дии санааҥ», – диэн көрөөччүлэргэ туһаайан эттэ. Аан бастаан үлэтин саҕалыырыгар туттубут мас суотун уонна саҥа кэм парадигматын культура саҥа миниистирэ Владимир Тихоновка туттарда.

Хомус музейын дириэктэрэ Николай Шишигин космоска тахса сылдьыбыт саха хомуһун А.Борисовка бэлэх уунна.

Андрей Борисовка дьонун-сэргэтин аатыттан ытыктабыл, махтал уонна харысхал бэлиэтигэр “Ил Кут” диэн Саха сирин духуобунай лидерин бэлиэтин түөһүгэр ииллилэр.

Оттон Андрей Борисов өссө 1970-с сылларга Щепкин аатынан театральнай училищеҕа үөрэнэ барарыгар илдьэ барбыт чороонун санаан туран, бүгүн кэлбит хас биирдии көрөөччүгэ фарфоровай чорооннору бэлэхтээтэ.