Орто саастаах саха дьахтара нууччалыы саҥаран күлүбүрэтэн массыынаҕа олорор эр киһини үөҕэн-мөҕөн барда. Ол быыһыгар, кимиэхэ эрэ эрийэ сатыыр. Кыыһырбыт абатын төлөпүөнүн экраныгар тарбахтарынан күүскэ баттаталыыр. Сотору соҕус буолаат, кэргэнэ быһыылаах, бөдөҥ-садаҥ нуучча киһитэ тиийэн кэллэ. Саҥата иҥэтэ суох массыынаҕа олорор саха киһитин күлүүһүн түннүк нөҥүө илиитин уган былдьаан ылла. Арай онно массыына иһиттэн эмиэ уҥуоҕунан кырата суох эрээри, улахан холуочук көрүҥнээх эр киһи тахсан кэллэ. 

Айдаан сүрүн төрүөтэ — паромҥа киириигэ массыыналары бэйэ-бэйэлэриттэн олус чугас ыга симэ туруортаабыттар. Холуочук суоппар чугас турар массыынаны аанын аһан тахсарыгар таарыйбыт. Кыраҕы харахтаах дьахтар массыынатын аанын кырааската кыһыллыбытын көрөн, онуоха эбии улахан холуочук суоппар кимтэн да кыбыстыбакка, холуочугун кистээн кирийэн олорбокко,  киирбитин-тахсыбытын тулуйа сатаан баран айдаардаҕа. Кинилэр тута ГАИ-ны ыҥырдылар. Оттон паром номнуо биэрэги булан тыраабын түһэрдэ. Икки айдаарсыбыт массыына суоппардара ГАИ-ны кэтэһэн олорон хааллылар. Паром устан кэлэрин күүппүттүү массыыналар кыралаан чугаһаабытынан бардылар. 

Өскөтүн, бу дьахтар айдаарбатах буоллун, бу улахан холуочук, этэргэ дылы атаҕар нэһиилэ уйуттар киһи куоракка киирээт туох быһылааны оҥоруо биллибэт этэ. Урукку өттүгэр паромҥа улахан уочарат эрэ буоллаҕына, полициялар бэрээдэк тутарга баар буолааччылар. Оттон паром үлэһиттэрэ итирик суоппардары тутар эбээһинэстэрэ суох. Ол эрээри, итирик суоппары паромҥа киллэрии — эмиэ улахан эппиэтинэс. Инникитин паромҥа бэрээдэги тутар, саахалга, ол у быһылааҥҥа тиэрдибэт туһуттан полиция үлэһиттэрин бэрэбиэркэтэ наада. 

Хаартыска: Ульяна Захарова.