Чурапчы улууһун 120 дальнобойщигыттан 70 суоппар ыарахан уйуктаах КамАЗ массыыналарынан параадтаан киирэн, быйылгы үлэ сезонун түмүктээтилэр. Тэрээһин күн суоппардар идэлэрин хайысхатынан уонна спорт араас көрүҥнэригэр күрэхтэстилэр. Ол кэнниттэн Чурапчы улууһунааҕы ыраах айан суоппардара “Арчы” дьиэтигэр арчыланнылар. Онтон "Айылгы" Култуура киинигэр кинилэри чиэстээһин буолла.

 Тендер көннөрү суоппарга охсуулаах

Чурапчы бэтэрээн суоппардарыттан биирдэстэрэ Николай Пермяков 1994 сыллаахха бэйэ дьыалатын тэриммит. Николай Николаевич тендер хайысхата олоххо киириэҕиттэн, кэлиҥҥи кэмҥэ көннөрү суоппардар сакааһа суох хаалар түбэлэтэлэрэ үгүһүн бэлиэтиир. Урут "Сахазернопродукт" тэрилтэҕэ үлэлиир эрдэхтэринэ, суоппардар таһаҕас тиэйиитигэр сылдьан, бастайааннай үлэлээх курдук сананаллар эбит. "Кэлин тендер үөдүйүөҕүттэн өрүү кыайтарар аакка сылдьабыт. Онуоха эбии быйылгыттан үлэбитин саҥардыы үчүгэйдик төлөөн иһэн, "кириисис" диэн эмиэ бычыах-бычыах төлүүр буолан бардылар", -- диэн кэпсиир Николай Пермяков. Кини эрэ буоллуо дуо, үгүс суоппар сүрүн кыһалҕата ол эбит.

 Бэдэрээччити булуу көмүскэ тэҥнээх

Алексей Ефремов 4 оҕолоох ыал аҕата. Улахан дьиэ кэргэн аҕа баһылыга дальнобойщигынан үлэлиирин ордорор. Кини 2006 сылтан бэйэ дьыалатын тэриммит. Бастаан таксистыы сылдьыбыт. Билигин хоту улуустарга таһаҕас тиэйиитигэр сылдьар уопуттаах суоппар. Алексей Афанасьевич бэлиэтииринэн, билиҥҥи суоппардар сүрүн кыһалҕалара -- таһаҕас тиэйиитигэр бэйэлэрэ суолу тобулаллар. Ол курдук, ханнык улууска туох улахан тутуу барарын бэйэлэрэ кэтии, билсэ олороллор.

-- Билиҥҥи бэдэрээччиттэр таһаҕастарын тиэйтэрэллэригэр бэйэлэрэ үчүгэйдик билэр суоппардарын кэпсэтэллэр эбэтэр бииргэ үлэлээбиттэрэ ырааппыт дьонноох буолаллар. Онон дальнобойщик суоппар элбээн, конкуренция эмиэ баар, -- диэн санаатын үллэстэр Алексей Ефремов.

Тыа сирин суоппарын үлэтэ дьоһуннук сыаналанна

Чурапчы суоппардара, биллэн турар, тумус туттар, ытыыктыыр киһилээхтэр. "Бөтүрүөбүс" - диэн таптал ааттаах киһини анаан көрсөн кэпсэттим.

- Билигин олох үчүгэй кэм кэллэ. Үлэҥ түмүгэ көстөр. Мин оскуолабын ааспыт уолаттар үксүлэрэ бэйэлэрэ биригээдэлээхтэр. Онон мин билигин уолбун уонна күтүөппүн кытта сылдьабын, - диэн кэпсиир уопуттаах суоппар. Суоппардар фестивалларыгар Семен Федоров сыралаах үлэтэ дьоһуннук сыаналанна - "СӨ үтүөлээх суол үлэһитэ" бочуоттаах аат иҥэрилиннэ.

Ити курдук, Чурапчы суоппардарын "Бадараан" диэн бастакы харалдьык тахсыытын, үлэ сезона бүтүүтүн бэлиэтиир бырааһынньыктара улахан фестивальга кубулуйан, сүргэлэрэ улаханнык көтөҕүлүннэ.