Кинилэргэ сүрүн утарсыыны Чурапчы, Мэҥэ-Хаҥалас, Хаҥалас оройуоннара оҥордулар. Күрэхтэһиигэ итини таһынан Амма, Уус-Алдан, Бүлүү, Үөһээ Бүлүү, Кэбээйи, Нам оройуоннара ситиһиилээхтик кытыннылар.

Дьокуускай хамаандатыгар эстафетаҕа эрэллээх кыайыыны дойду биир быһый атахтаах юниора, Россия үөрэнээччилэрин чемпионаттарын боруонса уонна үрүҥ көмүс призердара, ОСО-1 иитиллээччитэ Сергей Чунарев аҕалла. Иккис миэстэни ХИФУ, үсүһү Чурапчы улууһун 1-кы сүрүн хамаандата ыллылар.

Дьахталлар эстафеталарын ОСО-1 спортсменкалара кыайда, кинилэри кытта тилэх баттаһа Чурапчы уонна Хаҥалас улуустара таҕыстылар.

Биирдиилээн бастааһыҥҥа туох да соһуччу буолбата. Бэйэлэрин дистанцияларыгар кыайыыны фавориттар Михаил Жарин, Сардаана Трофимова, Нарыйа Матвеева уонна да атыттар ситистилэр. Спортсменнар бэйэ-бэйэлэрин олус бэркэ билсэллэр, кимнээх эрэ бииргэ эрчиллэллэр, сорохтор куруук илин-кэлин түсүһэллэр. Онон чемпионат "үчүгэй доҕордуулар" көрсүһүүлэригэр майгыннаата. Оттон саҥа кыттааччыларга уонна ыччакка бу күрэхтэһиилэр үчүгэй уопут уонна сыыһаны көннөрөргө төрүөт буоллулар.

"Барыта олус үрдүк таһымнаахтык барда. оҕолор үчүгэй түмүктэри көрдөрдүлэр. Холобур, Егор Филиппов уһуну үчүгэйдик ыстанна. Кини 25 сыл турбут Василий Николаев рекордугар сантиметрынан эрэ тиийбэтэ. Итини таһынан Кэбээйи улууһуттан Александра Григорьева 1 м 90 см үрдүккэ көттө. Ол эрээри, элбэхтэ үлэлиэххэ наада. Иннибитигэр олунньуга Дальнай Восток күрэхтэһиитэ күүтэр. Биири эбэн этиэххэ сөп – маассабас суох, ордук улахан дьоҥҥо. Итини хамнас намыһаҕынан быһаарыахха сөп. Дьон хас да үлэҕэ сылдьаллар, онон баран хаалаллар", - диир күрэхтэһии кылаабынай судьуйата, чэпчэки атлетикаҕа уолаттарга уонна кыргыттарга республика сүүмэрдэммит хамаандатын старшай тренерэ Василий Алексеев.