«Тохсунньу 30 күнүн сарсыардатыгар кыттыыччылар бастакы делегациялара -Иркутскайтан (11 киһи), Ямало-Ненецкоэй автономнай уокуруктан (3), Московскай уобаластан (1) уонна Бурятия Республикатыттан (1 ) көтөн кэллилэр», - диир волонтер Алексей Данилов.

Кини этэринэн, бэйэлэрин регионнарын чиэһин көмүскүү олус күүстээх спортсменнар кэлбиттэр.

"Биһиги хотугу республикабытыгар аан бастаан кэлбит олус бэһиэлэй, кэпсэтинньэн делегаттар бааллар. Ыалдьыттары "Триумф" спортивнай бэлэмнэнии киинигэр уонна олимпийскай эрэл училищетыгар олохтоотубут. Кинилэр биһиги Сахабыт сирин тымныы сарсыардатын наһаа сөбүлээтилэр, төһө да автобус түннүгүнэн эрэ көрдөллөр олус элбэх өйдөбүл санааланнылар", - диэн кэпсээтэ Данилов.

Тэрийээччилэр этэллэринэн, чемпионакка 30 волонтер кыттыаҕа. Волонтердар сүнньүнэн чемпионат кыттыылаахтарын олорор сирдэригэр сылдьыахтара, ону тэҥэ спортсменнары уонна судьуйалары күрэхтэһиигэ арыаллыахтара.

Санатан эттэххэ, күрэхтэһиилэр "Дохсун" спортивнай комплекска ыытыллыахтара. Бары күрэхтэһиилэргэ ыалдьааччыларга киирии босхо, диэн СР волонтердары кытта үлэҕэ Киинин пресс-сулууспата иһитиннэрэр.