Саха сирин сүүмэрдэммит хамаандатын бастыҥнара классическайга киирсибит Кристина Тимофеева, уонна блочнайга киирбит Степанида Артахинова куһаҕана суох көрдөрүүлэммиттэрэ, ол эрээри ол бүтэһиктээх кыайыыга сатаан тиэрдибэтэ.

Эр дьоҥҥо тыҥааһыннаах киирсиигэ «кыһыл көмүс» мэтээли блочнайга Ямало-Ненецкэй уокурук бэрэстэбиитэлэ Чингис Ритчино ылла. Финалга кини биир дойдулааҕын Виктор Калашниковы  6:4 ахсаанынан баһыйда.
Боруонса мэтээли Забайкальскай кыраайтан сылдьар  Александр Дамбаев ылла.

Финалга блочнай оххо кыайыыны Орловскай уобалас спортсменката   Мария Виноградова  ситистэ, оттон «үрүҥ көмүс» Москва охчутугар Екатерина Коробейниковаҕа тигистэ. Үһүскэ Москваттан Диана Контоева  таҕыста.

Классическай оххо итэҕэтиилээх кыайыыны Московскай уобаластан  Александр Кожин ылла.
Күн бүтүүтүгэр дьахталларга классическай оххо финал улахан сэҥээриини ылла. Дойду биир бастыҥ юниоркаларыттан биирдэстэрэ  Арюна Жаргалова(Забайкальскай кыраай) уонна Россия сүүмэрдэммит хамаандатын чилиэнэ Инна Степанова (Бурятия) илин-кэлин түһүстүлэр. Спортсменкалар иккиэн эгил-тэгил түмүктэри көрдөрдүлэр,  түмүгэр, онус серияҕа ахсааннара  5:5 буолбута. Судьуйалар кыргыттарга биирдии оҕу биэрбиттэрэ, онно биир бэргэн ытыыны оҥорбут дойду Кубогын «кыһыл көмүһүн» ылыахтаах.  Бастакынан ох кирсин  Инна Степанова тарта уонна олох ии ортотугар түһэрдэ, Арюна Жаргалова  бэйэтин оҕун арыый ыраах ытан, Бурятия охчута кыайыылааҕынан буолла.

Түмүгэр, классическай оххо 2 уонна 3 миэстэлэри Забайкальскай кыраайдар ыллылар - «боруонсаны бу иннинэ Ханда Жамьянова ылбыта.

Бүгүн «Дохсуҥҥа» Россия хамаанданан бастыыр иһин күрэхтэһиилэрэ буола тураллар, эбиэт кэнниттэн Россия Кубогын хамаанданан кыайыылаахтарын быһаарсыы буолуоҕа.