«Олимпиец» спорткомплекска Дальнай Восток алта регионун 50-тэн тахса кыттыылаахтара буолуохтаах Россияҕа бастыыр иһин күрэхтэһиитигэр кыттар быраабы ылар иһин мэтээлгэ кииристилэр.

42 кг диэри ыйааһыҥҥа кыайыыны  Ирина Кутилова, 50 кг диэригэ – Анжелика Подоева бастаатылар, юниоркаларга 51 кг диэри ыйааһыннаахтарга  Уйгулана Степанова тэҥнээҕин булбата. Кинилэр бары Мииринэй куоракка тренер Родион Соломеникка дьарыктаналлар.

54 кг диэри ыйааһыҥҥа Үөһээ Бүлүү Намыттан оскуола үөрэнээччитэ  Розалия Харлампьева бастаата, 50 кг диэригэ – Валентина Тыасытова, 46 кг диэри ыйааһыҥҥа иккис миэстэни Уйгулана Васильева ыллылар, иккиэн Ньурба улууһун Маалыкайыттан сылдьаллар, тренер Василий Тыасытовка эрчиллэллэр.

Хамаанданан уопсай зачекка биһиги кыргыттарбыт иккис миэстэҕэ таҕыстылар, кинилэр Приморскай кыраай спортсменнарыгар сабырыйтардылар. Бастыҥ боксердарынан Саха Республикатыттан  Уйгулана Степанова , Магадан уобалаһыттан Ксения Яковенко уонна Дина Богданова ааттаннылар.