Олоҥхо геройдарын таҥаһын аныгылы моһуоннаан, кристаллон, органза, пластика матырыйаалларын уонна DVD-диискэлэри кини коллекциятыгар туһаммыт. Куонкуруска Л.Соловьева - «Авангарднай муодаҕа омук үгэһин илдьэ сылдьыы», «Тэрийээччилэр биһирэбиллэрэ» диэн икки бириэмийэнэн бэлиэтэммит.

Сааскы сүрүн дефилеҕэ Приамурьеттан, Хабаровскайтан уонна Дьокуускайтан эдэр кутюрьелар кытынныллар. Жюри дьүүлүгэр барыта 43 таҥас коллекциялара киирдилэр. Дизайнердар «Дебют», «Эксперимент», «Белый лист», «Этностиль», «Fashion street» (уулусса муодата) уонна «Театр абсурда» аат иһин күрэстэстилэр.

Людмила Соловьева, Дьокуускайдааҕы дизайн уонна технология колледжын студена:

- Маннык улахан таһымнаах куонкуруска мин бастакыбын кытынным уонна ситиһиибиттэн олус үөрдүм. Epic legacy уобараһы мин 2013 сыл алтынньытыттан ыла саҕалаабытым. Үөрэнэр колледжым студеннара тигэн, уһуйааччыларым сүбэлээн-амалаан көмөлөспүттэрэ. Коллекциябар олоҥхо сүрүн геройдарын таҥастарын аныгы муоданы кытта дьүөрэлээтим. Аныгы технологияны, муодалааһын ньымаларын хото туһанным. Ити барыта түмүллэн коллекциябар саҥаны, хатыламмат буолууну киллэрбитэ чахчы. Айыллан тахсыбыт уобарастарым блокбастердар уонна компьютер оонньууларын супергеройдарын кытта ханыылыы буоланнар, ордук ыччакка чугастар.

Муус устар 26 күнүгэр «Муода абылаҥа» куонкурус түмүктэниитэ «Арт Пространство Амур» VI-с бүтүн аан дойдутааҕы фестиваль чэрчитинэн ыытыллыбыт Fashion-эскиз түмүгэ таҕыста. Аһаҕас куоластааһын түмүгэр «Феи саванны» эскиз иһин биир дойдулаахпыт  Кристина Черемкина 30-тан тахса утарсааччытын куоһаран, II миэстэҕэ тиксэн үөрүүтэ үксээтэ.

Ыспыраапка:

«Муода абылаҥа» эдэр талааннаах кутюрьелар куонкурустара Амур биэрэгиттэн сыыйа-баайа арҕаа диэки сыҕарыйар. Сылын аайы бу куонкуруска Россия үөрэҕин 74 тэрилтэлэрэ (оскуолалартан саҕалаан университекка тиийэ) кытталлар. Олохсуйбут үгэс быһыытынан Владивостоктан, Хабаровскайтан, Биробиджантан, Читаттан, Улан-Удэттэн, Новосибирскайтан, Саха сириттэн, сороҕор Краснодартан уонна атын арҕаа куораттартан кыттааччылар кэлэллэр.