Миллер 120 мелуйуеннээх айпадын туттуо суо5а

Официальнайа суохтук этиллэр. Холобур, вице-премьер Дмитрий Рогозин телевизорынан АХШ президенэ Обаманы «Америкатааҕы партнерынан» ааттыыр, оттон «Твиттергэ» бэйэтин микроблогар кэлэн кинини «Барак Обмана» диэн ыыстыыр. Анарааҥылар да хаалсыбаттар.

Тоҕо айпадтан аккаастаннылар? Мин көрүүбэр, үспүйүөннээһинтэн куотаары. Кистэл буолбатах, Appleбородууксуйатын кодтарын АХШ спецсулууспалара тутан олороллор. Айфоннары, айпадтары үспүйүөннүүр тэрил оҥостубуттара ырааппыт буолуон сөп. Көннөрү дьон онтон куттанара наадата суох: кинилэр бэҕэһээ бырааһынньыктаабыт хаартыскалара, сибэккилээх хонууга устубут видеолара ЦРУ-ларга интэриэһинэйэ суох. Россия салалтатын үрдүкү эшелона сэрэнэрэ сөп. Кремльгэ тугу кэпсэтэллэрин бэйэлээх бэйэлэрин планшеттара интернет нөҥүө Америкаҕа ыыта сытар буолуон сөп. Ханныгынан солбуйуохха? Манна нууччалар икки улахан корпорация (Apple — Samsung) икки ардыгар бара турар сэриини туһаннылар.

Samsung планшета иһиллиир да буоллаҕына, информацияны ЦРУ-ларга биэрбэт ини. Кэриэйдэри кытта сыһыаммыт куһаҕана суох.

Джобсу ытыктаан

Айпады тоҕо оттон атыыласпыппытый? Урут номоххо киирбит Стив Джобс тыыннааҕар, Дмитрий Медведев кинилиин көрсүспүтэ. Көрсүһүү кэнниттэн министрдэригэр барыларыгар айпадтары атыылаһан биэрбитэ. Медведев оччолорго президент этэ. Сүүһүнэн планшеты атыыласпыппыт.

Миллер айпада

Ити долгуҥҥа оҕустаран буолуо, «Газпром» корпорация бырабылыанньатын бэрэссэдээтэ Алексей Миллер былырыын күһүн эмиэ айпад сакаастаабыта. Улуу газовай тэрилтэ тойоно «бюджетнэй» айпады мыыммыта. Ураты айпадка баҕарбыта. Ол түмүгэр «Газпром» икки сыллааҕыта аһаҕас конкурс биллэрбитэ. 115.000.000 солк. сыаналаах анал планшеты сакаастаабыта. Ким саамай кылгас болдьоҕу уонна кыра сыананы эппит кыайыахтааҕа. «Газпром» үбүн, дойду баайын суотугар.

Тендер техническэй сорудаҕын көрдөххө, бу супер-планшет көмөтүнэн Алексей Борисович ханна баҕарар сылдьан (даачаҕа олорон, массыынанан айаннаан иһэн, сылаас дойдуларга сылдьан) «Газпром» бары структураларын салайыахтааҕа. Ирдэбил быһыытынан, айос (iOS) операционнай систиэмэҕэ олоҕурбут аппаракка корпорация бүтүннүүтэ бас бэриниэхтээҕэ. Тендери «Сапран-групп» диэн тэрилтэ кыайбыта. Билигин оҥоһуллан бүтэн эрэр буолуохтаах.

Гааһы атыылаан аһаан олорор дойду сүрүн тэрилтэтин бас киһитэ тугу толкуйдуурун, кимниин-тугу суруйсарын, ханнык дьаһаллары биэрэрин ЦРУ агеннара көрө олороллоро астыга суох буолаарай? Планшет, смартфон хаһаайыныттан ыйыппакка, ханнык баҕарар информацияны дойдутугар — акыйаан уҥуор ыытар кыахтаах.

Крым кэннэ

Билигин, политическай быһыы-майгы уларыйбытын кэннэ, Алексей Миллер оҥоһуллан бүтэн эрэр айпадын хайыырый? Саҥа тендер биллэрэн, аны, Samsung операционнай систиэмэтигэр олоҕуруҥ диэ дуо? Мин көрүүбэр, хайата да буолбат туруктаах. «Сапран» бүтэрдэҕинэ, «газпромнар» үлэни тутуохтара уонна туһаммакка ыскаапка ууран кэбиһиэхтэрэ. 115 мөлүйүөн салгыҥҥа көттөҕө ол.

Прокопий Бубякин

P.S. Мин бу текси эмиэ айфон телефоҥҥа суруйдум. Төһө да ЦРУ-лар буолбуттарын иһин, мин сараапайдаабыппын сатаан аахпаттар ини. Сахалыы тылы үөрэппэтилэр, саха киһитин үлэһитинэн туппатылар ини. Мантан сэдиптээн идея үөскээн кэлэр. Россия правительствотын, ФСБ о.д.а. структуралар кистэлэҥ докумуоннарын сахалыы тылынан суруйуохха сөп. Сэрии сылларын туһунан кэпсээн баарын өйдүүгүт дуо: ниэмэстэр иһиллии олорор линияларынан нууччалар ыксаан казаҕы уонна саханы кэпсэтиннэрбиттэрин? Кистэлэҥ документацияҕа саха тылын киллэрэр киһи, эмиэрикэлэр үспүйүөннэрэ «хоос» гыныах этилэр.