Айыы Уолунуун мин көрсүһүүм

Урут СГУ үөрэххэ туттарсыытын кампанията УЛК спортивнай саалатыгар олохсуйар этэ. Саала иһигэр эргиччи ДВП фанералартан турар хостору – тутар хамыыһыйа офистарын оҥортууллара. Оннук сүүрбэччэ «хостоох» «дьиэттэн» биир хоһо -- саха тылын факультетын хоһо этэ. Мин үс эксээмэн түмүгүнэн  23 баалы ылан үөрэххэ киирбэт хомолтотун билбитим. Ол эрээри салгыы бу факультекка туттарсар (кэлин сыыйа «очнайга» көһөр баҕалаах) туттарсар санаанан докумуоннарбын кэтэхтэн үөрэххэ биэрбитим.
От ыйын бүтүүтэ этэ. Абитуралыы кэлэн баран билсибит, Хара Алдантан сылдьар, эмиэ бэйэм курдук килэрийбит уолаттардыын били «хоспут» таһыгар сээкэйи сэлэһэ турдубут. Арай, ол туран аалыҥнаһар сүүһүнэн киһи ортотугар биир уолу бэлиэтии көрдүм. Ортону аннынан уҥуохтаах, сүүһүгэр түһэ сылдьар уһун баттаҕын силэйэн анньына сылдьар, кулгааҕар сигаретаны кыбыппыт уол мичээрдии-мичээрдии барыларын кытта дорооболоһо-дорооболоһо биһиги диэки иһэр эбит. Табаарыстарым табаарыстара буоллаҕа дуу, дии санаатым. Онтум баара, букатын билсибэт эбиттэр. Биһиэхэ тиийэн кэлэн «Шурикпын» дии-дии билистэ.

Мин «Пронябын» диэтим быһыылаах. ФЯФиК-ка туттарса сылдьарбытын кэпсээтим, кини эмиэ биһиги отделениебытыгар докумуонун биэрбит этэ. Бу тухары кимин билбэппин. Кэпсэтэр кэммитигэр биһиги тула киһи бөҕө муһунна. Кэлэ-кэлэ билсэллэр, уолбут киһи бөҕөтүнүүн дорооболоһор. Маҥан ырбаахылаах, сып-сырдык уол барыларыгар биир кэм мичээрдиирэ, толору дьоллоох көрүҥнээҕэ. Ол кэмҥэ атаһым: «Айыы Уола сылдьар дии» диэн сибигинэйдэ. Дьэ, онно соһуйдум. Александр Самсонов оччолорго саамай үгэннээн аатыра сылдьар кэмэ этэ. «Биллэр ырыаһыт эрээри, олох улаатымсыга суох уол эбит» дии санаабытым. Айыы Уолун бастакы уонна бүтэһик көрүүм этэ.
Оскуолаҕа үөрэнэ сылдьан «Эдэр саас» хаһыакка кини туһунан суруйалларын ааҕар ахан этим. Кылааһынньыгым Слава Гаврильев «Айылҕа чочуйбут оҕото буоламмын…» ырыатын наһаа сөбүлээн ыллыырын куруук истэрим. Дьиҥэр, ол кэмҥэ оҕо барыта кини ырыаларын ыллыыра...
Ол сайын кэтэхтэн үөрэххэ киирбитим. Айыы Уола эмиэ үөрэххэ киирбит этэ, ол эрэн күһүн бастакы сессияҕа үөрэнэ кэлбэтэҕэ... «Айыы Уола» суох буолбут диэбиттэрэ.
Ыалдьарын букатын билбэт этим. Фанатка кыргыттар «Эдэр саас» хаһыакка «мин эйиигин таптыыбын, ханнык да балыыһаҕа эйигинниин бииргэ буолуом» диэн суруйалларын өйдөөбөт этим. Кыргыттар тоҕо эмиэ балыыһаны ыатардылар, диирим. Ыарахан ыарыы кинини быһа кэрбии сылдьыбытын кэлин билбитим...
Кэлин «Эдэр саас» редактора буолан баран ийэтиниин Марфа Иннокентьевналыын билсибитим. Хаста да киниттэн интервью ылан ыстатыйа таһаардыбыт, Айыы Уолун кэриэһигэр ыытыллар ырыа фестивалларын өрүү сырдатабыт. Мин санаабар, кинилэр иккиэн – ийэ да, уола да, саха ыччатыгар кытаанах санаа холобура буолар дьон. Саша аата ааттанарыгар хорсун ийэтэ сүҥкэн оруоллаах. Санаа бөҕөҕө баттата сылдьан кэнсиэрдэргэ уолун бэлэмниирэ, суох буолбутун кэннэ аһыы бөҕөҕө ыллара сылдьан уол аатын үйэтитэргэ үлэ бөҕөтүн ыытта. Марфа Иннокентьевна уйа-хайа суох ытыы сылдьарын хаһан да көрбөтөҕүм да, истибэтэҕим да. Эһиги да истибэтэх буолуохтааххыт. Ол гынан баран кини сүрэҕэр билигин да – оҕотугар муҥура суох таптал, ааспат-арахпат аһыы баарын билэбит...
Марфа Иннокентьевна хас да сыллааҕыта редакцияҕа киирэ сылдьан «Саша туһунан киинэ устуохтарын баҕарарын» кэпсээбит. Онуоха бэйэм билэр уолаттарбын, «Герои» киинэни устубут бөлөҕү таларыгар этии киллэрбитим. Ол эрэн кини онно режиссер Марианна Скрыбыкинаны талан, номнуо матырыйаалларын биэрэн үлэлэһэ сылдьар этэ. Билигин киинэни көрөн баран сыаналаатахпына, киниэхэ сөпкө тохтообут эбит. Киинэ ис хоһоонун дьүүллэспэппин, киһи мөккүһэрэ баар гынан баран, сүнньүнэн, киһи дууһатын кылын таарыйар олус үчүгэй айымньыны устубут.  

Прокопий БУБЯКИН, «Эдэр саас» редактора.
 
P.S. Тохсунньу бүтүүтэ, Дьокуускайга киинэ премьератын кэмигэр Бүлүү бөлөх улуустарынан үлэбинэн командировкаҕа сылдьыбытым. Киэһэ Бүлүүтээҕи профлицей уопсайыгар киирэ сылдьан, мин саха уолаттара хоско гитаранан «Ханна да, ханна да буолларбын ыллыаҕым» ырыаны ыллыы олороллорун долгуйа истибитим. Саша Самсонов ырыалара...