Олимпиада кэнниттэн олох

Ол оннугар эмэ 1980 сыллааҕы курдук, олимпийскай эһэ миискэ факел уотун саба үрэрин нациялар бары уйадыйа көрдүлэр. Эһэ миискэ, куолутунан, ытаата, ол эрэн салгыҥҥа көппөтө. «На трибунах становится тише, тает быстрое время чудес, до свидания, наш ласковый Миша, возвращайся в свой сказочный лес» диэн Лев Лещенко ыллаан атаарбыт эһэтин сэмнэҕэ Подмосковье тыатыгар түспүтүн булан тураллар. «Аптаах тыа» суоҕун билэн эбитэ дуу, тэрийээччилэр «уолу» көтүтэртэн аккаастаммыттар.  
Аны дойду күннээҕи олоҕор, көннөрү олохтоохторугар төннүөххэ. Иллэрээ күн Ульяновскай куоракка УАЗ массыына собуота үлэтин тохтотто. Саха сиригэр сүүрэ сылдьар уазиктары барыларын кини оҥорор. Депутат Николай Румянцев «Колми-95» тэрилтэтэ -- собуот дилерэ... Собуот салалтата «үлэни быстах кэмҥэ тохтотобут, долгуйар төрүөт суох» диир. Кулун тутар 11 күнүгэр урукку режимнэригэр төннөллөр үһү. Оттон билигин үлэһиттэри күүстэринэн «туһанылла илик» уоппускаларыгар ыыталыы олороллор. Итини таһынан, бу иннинэ аҕай, дойду автопромун саамай улахан собуота -- «Автоваз» 2500 үлэһитин «сокращениеҕа» ыытарга быһаарбыта. Онуоха Госдума депутата Владимир Гутенев «Автоваз» Бу Андерссон диэн топ-менеджеригэр кыһыйан-абаран «дьону тоҕо ууратарын киһилии быһаарарыгар» модьуйда.
Олимпиада кэннэ олохтоохтор курбутун балайда ыга тардыныахтаахпыт сэрэйиллэр этэ. «Олимпиада кэннэ рис, саахар ыарыаҕа» диэн дьон оптовайдарга кырыммыттара ыраатта. Россия, дьиҥэр, ыга тардынары ыраахтааҕы саҕаттан сатыыр. Олохтоохтоор билигин да ону утарбаттар. «Левада-центр» Олимпиада иннинээҕи ыйытыгын отчуота көрдөрөрүнэн, респонденнар 60%-нара Сочи Олимпиадатын этэҥҥэ ыытар туһугар, кэлин сыана кыратык ыарыырын тулуйарга сөбүлэһэр этилэр.
Иккис өттүттэн ыллахха, экономистарбыт Россия бэйэтин куоратыгар Олимпиаданы ыытыыта -- дойду сайдыытын валовой бородууктатыгар 0,3% аҕалар диэн аахтылар. Куһаҕана суох сыыппара. Биатлоҥҥа, керлиҥҥа, хаҥкыга киирэр билиэти атыылааһынтан оччо харчы киирбитэ буолуо дуо? Буолуон да сөп: хоккейга «Россия – Финляндия» оонньуулларыгар биир билиэт спекуляннарга 40000 солк. атыыламмыта дииллэр.
Билигин үгүс киһи «аатырар Сочиларыгар эһиил сынньана, хайыһардыы барар киһи хайдах эбитэ буолла?» толкуйданар буолуохтаах. Олимпиада бүтэр, объектар хаалаллар. Биһиэхэ «Азия оҕолорун» кэннэ «Труимф», «Чолбон», «Модун» хаалбыттарын курдук...
 

P.S. УАЗ туһунан. Олимпиадаттан сылтаан буолбакка, «УАЗ» ААО -- массыынатын хаачыстыбата мөлтөҕүттэн, онтон сылтаан атыыга барбатыттан үлэтэ тохтообут буолуон эмиэ сөп. Саҥа массыынаны атыылаһаат, суоппардар 25 тыһ. солк. сыанаҕа «усилиение» оҥортороллоро биллэр – эбии угольниктары иһэрдэллэр, тирээбил, тартарыы бөҕө туруораллар. Онто суох, сабыс-саҥа массыына сыл иһигэр быстан-тохтон бүтэр. Ити үлэ барыта собуот таһымыгар оҥоһуллуохтааҕа буолуо, эрээри... Ол эрээри УАЗ-ик оҥорооччулара кыһамматтар: «Пусть доделают сами!». Этэргэ дылы, «Сделай сам!». Уазигы өрүү сахалар эрэ атыылаһаннар баччааҥҥа диэри рентабельнай  олорбут буоллаҕына да көҥүлэ. Атын регионнар иномаркаларга көспүттэрэ ыраатта. Биһиги да көһүөхпүтүн, улуустарбыт суолларынан уазиктан ураты массыына сатаан сылдьыбат.