Кулун тутар 12 күнүттэн саҕалаан ыам ыйын 2 күнүгэр диэри икки ый устата көрүүтэ-истиитэ суох сылдьар ыттары тутуу биллэриллибитэ. Баччаларга муус устар 2 күнүгэр Ил Түмэн маннык ыттары тутуунан уонна көрүүнэн-харайыынан муниципальнай тэриллии дьарыктаныахтааҕын туһунунан сокуон барылын ылыммыта.

«Биир ый иһигэр барыта 4 тыһ. көрүүтэ-истиитэ суох сылдьар ыт тутуллубут. Булуҥ, Үөһээ Дьааҥы, Бүлүү, Мииринэй, Муома, Нерюнгри, Хаҥалас улуустара бу дьаһалы олоххо киллэрдилэр», – диир  Анастасия Никитина.

18 улууска олохтоох бюджеттан бэйдиэ сылдьар ыттары тутарга анаан 7 мөл. солк. көрбүттэр. 17 муниципальнай тэриллии ыттары тутууга манан анаан дьарыктанар 31 тэрилтэлэри кытта дуогабар түһэрсибиттэр.

Анастасия Никитина дьиэ кылларын туһунан эппитинэн, муус устар 11 күнүнээҕи туругунан дьиэ кыыла барыта регистрацияламмыт. Кыыл ахсаана Саха сиригэр 55 тыһ. Онтон 40,7 тыһ. — ыт, 14,6 тыһ. — куоска, 439 — экзотическай кыыллар. Ветеринарнай сулууспа кыыл тутуллар усулуобуйатыгар анаммыт бэрэбиэркэни ыыппыт уонна усулуобуйа 151 кэһиллибитин быһаарбыт.

Ыттары, куоскалары тутан олорууга үҥсүүнү хомуйар 83 биир кэлимсэ диспетчерскэй сулууспалар муниципалитеттарга үлэлииллэр. Бу сулууспаларга номнуо 617 үҥсүү киирбит. Саамай элбэх 536 үҥсүү Дьокуускайтан киирбитэ биллэр.