Былырыын «Биэбэйчээннэрим» диэн оҕолорго аналлаах кинигэ электроннай көрүҥэ аан бастаан киирбитэ, онтон биир сыл буолан баран, кыһа контенын кэмиттэн кэмигэр саҥардан биэрэн, ааҕар, практическай өртүнэн туһанар кинигэ ахсаанын сүүстэн таһааран, өссө да элбэтэ турар былааннаах.

«Дьон үөрэннэҕинэ кинигэ электроннай көрүҥүн атыылаһан ааҕар буолуо. Сахалар саҥаны, сонуну ылынар дьоммут, онон ордук ыраах улуус олохтоохторо Интернеккэ киирэн, сөбүлээбит кинигэлэрин хачайдаан ааҕыахтара, төрөппүттэр оҕолорун сурукка, ахсааҥҥа дьарыктыахтара, оҕолорун кыра сааһыттан ааҕа-суоттуу үөрэтиэхтэрэ», -- диэн этэр кыһа салайааччыта Август Егоров.

«Бичик» электроннай кинигэлэрэ төлөпүөн балансатыгар харчы уган, эбэтэр банковскай карточканан төлөнүөхтэрэ. «Книги издательства Бичик» электроннай сыһыарыыга сахалыы, нууччалыы уонна аҕыйах ахсааннаах хотугу норуоттар тылларынан кинигэлэр киириэхтэрэ. Саха литературатын классиктарын, билиҥҥи суруйааччылар айымньыларын, эдэр ааптардар уус-уран суруйууларын, тылбаас үлэлэри, Олоҥхо дойдутун историятын, культуратын, этнографиятын туһунан кинигэлэри аан дойду хайа баҕарар муннугар баар киһи киирэн көрүөн, талыан, атыылаһыан сөп.

Сахалыы мультимедийнэй кинигэ кэнниттэн электроннай кинигэни киэҥник тарҕатарга бастакы дьоһун хардыы оҥоһуллан, «Бичик» аныгы технологияҕа саҥаттан саҥа саҕахтары баһылаан, таһымын үрдэтэн иһэргэ дьулуһар.

Электроннай бырайыак олоххо саҥа киирэр кэмигэр Улуу Кыайыы 70 сылын көрсө аатырбыт Егор Чээрин туһунан кэпсээни уонна оҕолорго «Кулун Куллустуур» олоҥхону босхо хачайдаан ааҕыахха сөп. Онон, Playmarket-ка, AppStore киирэн, «Книги издательства Бичик» көрдөөҥ, ааҕыҥ, сэргээҥ!