Көрүүтэ-харайыыта суох, бэйдиэ сылдьар ыттар оҕолорго саба түһүүлэрин кэнниттэн ыттары тутар туһунан быһаарыы ылыллыбыта. Нэһилиэнньэни бэйдиэ сылдьар кыыллартан көмүскүүр эбээһинэһи муниципалитеттарга сүктэрэр туһунан Ил Түмэн сокуона — икки ый устата салҕанан барбыт үлэ биир быһаарыллыбыт түмүгүнэн буолбута.
«Бэйдиэ сылдьар кыылы хонтуруолуур боломуочуйалаах киһи хас нэһилиэк ахсын баар буолуохтаах. Дьон бу туһунан үҥсүүтүн дьаһалтаҕа түһэриэхтээх. Бүгүҥҥү туругунан 30 муниципальнай тэриллиигэ боломуочуйалаах 192 киһи бигэргэннэ. Мэҥэ-Хаҥаласка, Намҥа, Орто Халымаҕа, Уус-Маайаҕа уонна Булуҥҥа быһаарыы ылыллыбакка турар», - диэтэ Макарова.
30 муниципальнай тэриллиилэргэ 56 биригээдэ тэриллибит. Биригээдэ бэйдиэ сылдьар ыты тутар эбээһинэстээх. Икки ый устатыгар 24 муниципалитеттар олохтоох бюджеттарыттан упсайа 9,6 мөл. солк. көрдүлэр.
Саха сирин үрдүнэн үҥсүүнү хомуйар 137 диспетчерскэй сулууспа үлэлиир. Манна икки ый устатыгар уопсайа 686 сайаапка уонна үҥсүү киирбит. Нерюнгри оройуонун баһылыгын солбуйааччы Лидия Лоскутова этэринэн, диспетчердэргэ киирбит үҥсүүлэр ыттары тутар биригээдэлэргэ бэриллэллэр.
Ветеринардар бу кэм устата бэрэбиэркэ ыыппыттар, онно бэрээдэги 276 кэспиттэрэ бэлиэтэммит. Ол иһигэр 77 киһи кыылын вакцинациялаабатах.
Анаабырга, Намҥа, Томпоҕо уонна Чурапчыга специализированнай биригээдэлэр суохтар.
Комментарии
Авторизация на сайте через социальные сети