ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт

Похожие новости

22 апреля 2014, 16:31

Саха театырын аатырбыт артыыһа Анна Кузьмина «Көмүс мааска» бэлиэнэн биһирэннэ


59-й сезонун, ол эбэтэр 1955 сылтан ыла Саха театырын сыанатыгар оонньуу тахсар Анна Кузьмина хайдах артыыс буолбутун, «Көмүс маасканы» үөрүүлээхтик туттарыыга кини таһыгар үс чаас олорбут Арассыыйа албан ааттаах артыыһа Марк Захаров туох диэбитин суруналыыстарга кэпсээтэ.

«Республика олоҕор киһи итэҕэйиэ суоҕун курдук бэлиэ түгэн тосхойдо. Марк Захаров, Галина Волчек, Олег Басилашвили курдук Арассыыйа албан ааттаах, суон сурахтаах артыыстарын, театыр искусствота сайдарыгар олохторун анаабыт дьону кытта биир тэҥ үктэлгэ туруоран, биһиги артыыспытын Анна Кузьминаны «Кыһыл көмүс мааска» бэлиэнэн наҕараадалаатылар», - диэтэ Саха театырын дириэктэрэ  Анатолий Николаев.

 Анна Кузьмина«Бу наҕарааданы туттарар тэрээһин Улахан театырга үс чаас устата салҕанан барда. Мин Марк Захаров таһыгар олорбутум. Оруобуна киниэхэ үөрэнээччититтэн Сергей Потаповтан эҕэрдэ тиэрдиэхтээх этим. Мин Сергей эҕэрдэтин тиэртим, онуоха Марк Захаров тоҕо эрэ тугу да саҥарбата. Онтон Потапов Шекспир «Тит Андроник» бастакы пьесанан «Тиит» диэн испиктээкили туруорбутун туһунан эттим. Онуоха киһим «Эһиги Шекспири туруорары кыайа-хото тутаҕыт, сатыыгыт» - диэн өрөйө-чөрөйө, үөрэ түстэ.

Биллэн турар, бу бириэмийэни туттарыыга тыл этэргэ эрдэттэн бэлэмнэммитим. Атыттар төрөппүттэригэр, дьиэ кэргэннэригэр махтаналлар эбит. Дьиэ кэргэн — бу эн саамай чугас дьонуҥ син биир эн тускар долгуйаллар. Оттон мин биһигини үөрэппит-такайбыт, олоҕум усталаах туоратыгар үтүө өйдөбүл гынан сүрэхпэр-дууһабар илдьэ сылдьар, бу чулуу искусствоҕа уһуйбут, Щепкин аатынан училищебыт учууталларыгар махтанным. Биһиги театырбытыгар бу училищены бүтэрбит биэс выпуск баарбыт. Биһиги бөлөхпүт училище көөччөх гынан көтүппүт национальнай бастакы хараҥаччылара этибит», - диэтэ Анна Кузьмина.

Эрдэ бу олохтон туораабыт ийэтэ кырачаан Анята медик буоллар диэн ыра санаалааҕа. Ол эрээри Анна Нөмүгүттэн Дьокуускайга үөрэнэ кэлэн баран драма куруһуогар умсугуйан туран сылдьыбытынан барбыта. «Оччолорго бу куруһуогу ГИТИС үөрэх кыһатын бүтэрэн кэлбит Егор Дьячковскай иилиирэ-саҕалыыра. Щепкин аатынан училищеҕа үөрэниэн баҕалаахтары хомуйуу саҕаламматаҕа эбитэ буоллар, ол дьарыгым халтайга хаалыах этэ. Бу училищеҕа киирбиппин чугас дьонум: «Эн медик буолуохтаах этиҥ» - диэн олус сэмэлээбиттэрэ. Мин 17 саастаахпар Москваҕа үөрэнэ барбытым уонна күн бүгүҥҥэ диэри бу идэни баһылаабыппыттан кыратык да кэмсиммэппин», - диир кини.

Саха театыра маннык «Көмүс маасканы» үһүс төгүлүн ылар. 2001 сылга «Кыыс Дэбилийэ» олоҥхо иһин «Приз критики» номинацияҕа бу бэлиэни туппута. 2005 сылга бу бириэмийэни эдэр талааннаах режиссер Сергей Потапов Эжен Ионеско «Макбет» айымньытын туруоруу иһин ылбыта. Бу наҕараада иһин Саха театра «Илиир Хоруол» испиктээкилинэн эмиэ кыттыбыт кэмнээҕэ. «Оччолого биһиэхэ биэрбэтэхтэрэ эрээри судаарыстыба бириэмийэтинэн наҕараадаламмыппыт» - диэн эбэн эттэ Анатолий Николаев.  

2006 сыллаахха Сюзанна Ооржак «Иччитэх дьиэ» (Дом Бернарды Альбы) Гарсиа Лорк испиктээкилэ киирбитэ эрээри, наҕараадаҕа тиксибэтэҕэ.    

«Үһүс мааска чуолаан биир киһиэхэ — Анна Кузьминаҕа бэриллибититтэн биһиги үөрүүбүт муҥура суох». Саха театыра баай историялаах, быйыл 107 сезона буолла. Оттон Анна Кузьмина бу театырга 1955 сылтан бэттэх сыламтата суох үлэлиир. Кини Саха театырыгар олоҕун бүтүннүүтүн анаата. Маннык бэриниилээх дьонноох буоламмыт театырбыт күн бүгүҥҥэ диэри өрө тахсыылаахтык үлэлиир», - диэтэ Анатолий Николаев.

Анна Кузьмина 81 хаарын быйыл санныгар уулларда. Төһө да саас баттаабытын иһин кини таптыыр театырынаан гастролларга сыламтата суох сылдьар  «Республикаҕа мин сылдьыбатах сирим диэн суох», - диир кини.  Россия үрдүк биһирэбил бэлиэтигэр сыһыары тутуллан, муус устар 26-27 күннэригэр Саха театырын сценатыгар Анна Кузьмина кыттар  Алехандро Касон  «Тииттэр охтубакка кэхтэллэр» драмата уонна кини кыыһа  Лидия Васильева оонньуур «Хаһан да» пьесата көрөөччүлэргэ анаан сцена быыһын тэлэччи аһыаҕа.

При частичном или полном использовании материалов гиперссылка на сайт ysia.ru обязательна.
Категория: Культура Просмотров: 1912 Источник: ЯСИА Автор: Нюргуяна Стручкова Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ