Егор Борисов үөһэттэн анаммытын, ону Государственнай Мунньах (Ил Түмэн) бигэргэппитин бары да билэбит. Норуот президени быыбардыыр бырааба эргиллээтин кытта элбэх субъект баһылыктара норуотунан талыллаары болдьоҕу иннинэ быыбарданарга тиэтэйдилэр. Сорохтор ити ыра санаалара туолбата. Норуот талбыта эбэтэр парламент бигэргэппитэ оруолу оонньообот эрээри, норуот талбытын аата-суола, аптарытыата да улахан. Ол туох-ханнык иннинэ дьоҥҥо-сэргэҕэ наада. Субъект баһылыга дьон-сэргэ иннигэр отчуоттуурунан да буоллун.

 Егор Афанасьевич буолаары турар бу быыбарга бэйэтин кандидатуратын туруорунан, «самовыдвиженец» быһыытынан кыттара ордук буолуох этэ дии саныыбын. Ити политическай да, историческай да суолтата муҥутуур улахан. Бу халтай, кураанах тыл буолбатах.

Итинтэн Саха сирин элбэх омуктаах норуота бүтүннүүтэ итэҕэлиттэн, омугуттан, идеологиятыттан тутулуга суох биир сомоҕо буолара быһаччы тутулуктаах. Быыбар чэпчэки буолуо суоҕа. Егор Борисов кыайыытыгар ким да саарбахтаабат. Мин саныахпар, кандидаттар тустарыгар буолбакка, бырыһыан, дьон куолаһын иһин тыҥааһыннаах киирсии күүтүллэр.