Россия Уһук Илини стратегическай суолталааҕынан ааҕан, инники күөҥҥэ тутарын кини бэлиэтээн эттэ: «Регион экономиката көдьүүстээхтик үлэлиирин туһугар экономическай, бюрократическай бытаарыы төрдүттэн суох оҥоһуллуохтаах. Импорты солбуйар технологиялар киирэллэрин, табаар уонна өҥө сыаната биллэ үрдээн, экспорга тахсарын ситиһиэхтээхпит. Регион Россия иһигэр уонна таһыгар, ол эбэтэр аан дойду таһымыгар үлэни үллэриигэ бэйэтин аналын булуохтаах. Ону таһынан производственнай кооперация аан дойдутааҕы тиһигэр киирэн биэриэхтээх».

Дмитрий Медведев Азия, Чуумпу акыйаан эргимтэтигэр киирсэр дойдулары кытта ыкса ситим олохсуйуохтааҕын ойуччу тутта: «Манна хардарыта үлэни ыытарга кыах улахан. Ол сайдарыгар анаммыт тустаах мунньаҕы бэрт сотору тэрийиэхпит».

Правительства председателэ регион 2020 сылга диэри бигэргэммит үбүлээһинигэр тохтоото. Ол курдук, ити кэмҥэ диэри 346 млрд солк. көрүллүбүт. «Быйылгы үбүлээһин оччо улахана суох. Ол эрээри, эбии кыах көһүннэ эрэ ити үрдүөхтээх», - диэтэ кини.

Балаҕан ыйын 30 күнүгэр диэри 2013 сыллаахха халаан содулугар түбэспиттэргэ туһуламмыт үлэ барыта түмүктэниэхтээҕин, хаарбах дьиэлэртэн көһөөччүлэргэ саҥа дьиэ күлүүһэ бэриллиэхтээҕин кини эттэ. «Үп-харчы бүтүннүүтэ регионнарга бэриллибитэ. Бэдэрээччиттэри бары бэркэ билэҕит. Онон үлэ хаачыстыбалаахтык оҥоһуллан, болдьоҕор бүтүөхтээх. Алдьаммыт инфраструктураны чөлүгэр түһэриигэ 40 млрд солк. анаммыта», - диэтэ Д.Медведев.