8 млрд куб. м иэннээх тыа, ойуур баайдаах республика сыл аайы 6 эрэ бырыһыаны, оттон промышленнай тэрилтэлэр 2 эрэ бырыһыаны туһаҕа таһаараллар. 2013 сыл түмүгүнэн көрдөрүү 670 тыс. куб. м. диэри тиийдэ.

Тырааныспар инфраструктурата — тыа маһын соһор суол суоҕа үлэни биллэ харгыстыыр.

«Үлэһиттэр ойуур маһын суолтан тэйиччи бэлэмнииллэр. Бу мастарын тиэйэргэ бэйэлэрин кыахтарынын суолу солуурга тиийэллэр. Инньэ гынан, мас бэйэҕэ турар сыаната аһара үрдээн тахсар. Айылҕа, күн-дьыл туругуттан сылтаан тэрилтэлэр сылга түөрт эрэ ый устата үлэлииргэ күһэллэллэр», - диэтэ М. Бульший.

Тимир суолунан уонна уу тырааныспарынан оҥоһуллубут маһы тиэйии тарыыба олус үрдүгэ, онто да суох чэпчэкитэ суох быһыыны-майгыны өссө эбии уустугурдар.  

Нолуок төлөөһүнүгэр баар мэһэйдэртэн сылтаан тэрилтэлэри дьоҕус бизнескэ диэри бытарытарга тиэрдибит.

«Ойуур бизнеһэ оҥорон таһаарыы чааһыгар көдьүүһэ дуона суох. Тэрилтэ үбүн эргииригэр эбии үп-харчы мэлдьи наада», - диэтэ миниистири солбуйааччы.

Кини тэрилтэҕэ саҥа тыын, күүс-күдэх киллэрэргэ эбэтэр эргитэр үбү-харчыны мунньунарга нолуок ыар сүгэһэрин муҥ саатар кылгас кэмҥэ аччатар улахан суолталааҕын этэр.

«Тэрилтэлэр тиэхиньикэлэрэ олус эргэрдэ. Өссө сэбиэскэй кэм саҕана туруоруллубут оборудование билиҥҥэ диэри үлэлии турар. Тиэхиньикэ оҥорон таһаарыыта да, хаачыстыбата да аныгы кэм ирдэбилигэр сөп түбэспэт», - диэтэ Максим Бульший.

Оҥоһуллубут ойуур маһын экспорга таһаарыы суоҕун кэриэтэ. Баар кыһалҕаҕа таможня эбиилик буолар.

Саха сирин промышленноска министиэристибэтэ ойуур промышленноһын тупсарар туһугар «Суол каартатын» оҥорбут. Промышленность бу салаатын көдьүүһүн улаатыннарар туһугар 2020 сылга диэри араас тэрээһини киллэрбиттэр.

Тыа маһын тиэйэр суоллары оҥорууга федеральнай киин көмөтө улахан көдьүүстээх буолуон сөп.