«Генеральнай бэдэрээтчити кытта хантараагы көтүрэри туруорсабыт. Тоҕо диэтэххэ, эбийиэги тутуу болдьоҕо иккис сылын көһөрүллэр», - диэн суруналыыстарга тырааныспар уонна суол хаһаайыстыбатын миниистирэ Семен Винокуров эттэ.

Федеральнай киин таһымыгар тустаах быһаарыы ылыллыннаҕына, «Российские железные дороги» уонна «Железные дороги Якутии» компаниялар күүстэринэн тимир суол эриэ-дэхси үлэлиэҕэ.

"Томмот - Күөрдэм — Аллараа Бэстээх" бырайыак генеральнай бэдэрээтчитэ — Россия бөдөҥ холдина «Трансстрой». Бүгүҥҥү туругунан бу тимир суол учаастагар таһаҕас быстах кэмҥэ тиэйиллэр.

Томмот - Дьокуускай (Аллараа Бэстээх) 439 км уһуннаах суол 2013 сыл бүтүүтэ түмүктэниэхтээх этэ. Үбүлээһинтэн, о.д.а. баар кыһалҕалартан төрүөттэнэн тимир суолу үлэҕэ киллэрии болдьоҕо уһатыллыбыт.