Күрэхтэһиигэ уопсайа аҕыс хамаанда кэлбит: Башкортостан университетын Стерлитамактааҕы салаата, Тыва государственнай универститета, Приволжскай государственнай университет, Н.Ф. Катанов аатынан Хакас государственнай университета, М.Акмулла аатынан Башкортостан государственай педагогическай университета, Караганда университета (Казахстан) уонна Горнай Алтай государственнай университета.

Манна Саха сириттэн ХИФУ ХИНТуоКИ устудьуоннара доцент Елена Архипова салайааччылаах кытыннылар: Айта Федорова, Любовь Уарова, Дария Соловьева, Яна Стручкова уонна Ньургуйаана Стручкова. Итиэннэ научнай конференцияҕа ХИНТуоКИ устудьуона Иннокентий Лебедев уонна педагогическай институт магистрана Оксана Лугинова кытыннылар.

Бастакы күн кыттааччылар бэйэлэрин билиһиннэрдилэр, норуоттарын тылынан уус-уран айымньытын, ырыатын-тойугун толордулар, түүр тылынан хоһооннору аахтылар, астарын-таҥастарын билиһиннэрдилэр. Сахалар манна кыыһы кэргэн биэрии үгэһиттэн быһа тардыыны көрдөрдүлэр. Кинилэр нэдиэлэ устата Алтай хайаларыгар, Анохин аатынан национальнай музейга, Чорос-Гуркин төрөөбүт сиригэр, Чемал сэлиэнньэтигэр, Патмос арыыга, аатырар Телецкэй күөлгэ сырыттылар. Үгүс уруулуу омук ыччатыныын доҕордостулар. Павел Кучияк аатынан национальнай театрга Лазарь Кокышев «Туба» айымньытынан спектаклы көрдүлэр. Хайалаах Алтайга баар олохтоох сахалары көрүстүлэр. ХИФУ устудьуоннарын көҕүлээһининэн кэнсиэр тэрилиннэ. Манна эдэр ырыаһыт Кеша Лебедев отучча, сүүрбэччэ сыл анараа өттүгэр Саха сириттэн тэйбит биир дойдулаахтарбытын сахалыы ырыанан, оһуокайынан сэргэхситтэ.

Түүр тылларыгар, литератураларыгар уонна тылынан уус-уран айымньытыгар икки күннээх куонкурус түмүгүнэн ХИФУ хамаандатыттан ХИНТуоКИ 4-с кууруһун устудьуона Бүтүн Россиятааҕы олимпиадаҕа Айта Федорова II миэстэ буолла. ХИНТуоКИ 4-с кууруһун устудьуона Дария Соловьева «Былыргы түүр руническай суругар бастыҥ билиитин иһин», онтон ХИНТуоКИ 2-с кууруһун устудьуона Яна Стручкова «Түүр тыллаах литератураҕа бастыҥ айар үлэтин иһин» анал ааты ыллыллар. Конференция түмүгүнэн ХИНТуоКИ 3-с кууруһун устудьуона Ньургуйаана Стручкова III степеннээх лауреат буолла.

ХИФУ хамаандата Алтайга сырыыны сыл аайы өйүүр университекка, ректор Евгения Михайловаҕа, ХИНТуоКИ дириэктэрэ Гаврил Филипповка, салайааччыларыгар, учууталларыгар Елена Архиповаҕа, эрчийбит учууталларга Герасим Левиҥҥэ, Людмила Ефимоваҕа уонна бары күүс-көмө буолбут дьоҥҥо истиҥ махталларын тиэрдэллэр.

Кыттааччылар санаалара

Айта Федорова, ХИНТуоКИ 4-с кууруһун устудьуона:​ "Мин Хайалаах Алтайга үһүспүн сырыттым уонна баччааҥҥа диэри Алтай кэрэ айылҕатын сөҕөртөн сылайбаппын. Бу олимпиадаҕа иккиспин кытынным. Сыл аайы тэрээһинэ тупсан иһэр. Быйылгы олимпиадаҕа Казахстантан кэлэн кытыннылар, онон норуоттар икки ардыларынааҕы таһымнанна. Алтайга хас биирдии түгэн ураты, умнуллубат, кэрэ өйдөбүл буолан хаалла. Маннык олимпиада ыытыллара олус үчүгэй! Киһи олус сайдар, үгүс доҕоттордонор".

Люба Уарова, ХИНТуоКИ 4-с кууруһун устудьуона:​ "Мин Хайалаах Алтайга маҥнайгы сырыым буолан, барыта сонун. Телецкэй күөлгэ сынньалаҥмытын, Чемалга хайаттан көппүппүн уонна хамаанданан биир иллээх ыал курдук олорбуппутун өйдөөн хааллым. Олоҕум биир чаҕылхай, хаһан да умнуллубат кэмнэрин бэлэхтээбиккитигэр хамаандабар махтанабын".

Яна Стручкова, ХИНТуоКИ 2-с кууруһун устудьуона:​ "Элбэх дьону-сэргэни кытта билсибиппиттэн, элбэх дозоттордоммуппуттан астынабын. Алтай омугун культуратын, историятын, тылын, литературатын туһунан элбэҕи билбитим бэйэбэр улахан ситиһии буолар. Саха сирин, саха омугун аан дойдутааҕы таһымнаах олимпиадаҕа көмүскээн кэлбиппиттэн киэн туттабын. Алтай курдук кэрэ айылҕалаах сир көй салгынын иҥэринэн кэлбиппиттэн дуоһуйа астынным".

Оксана Лугинова, педагогическай институт магистрана:​ "Быйыл Культура сылын чэрчитинэн Норуоттар доҕордоһууларын түһүлгэтин тэрийдибит. Алтай биллиилээх норуодунай суруйааччыта Бронтой Бедюров ыыппыт конференциятыгар кыттыбыппыттан үөрэбин. Телецкай күөлгэ сырыыбытын, Эркемен Палкин кэргэнин кытта көрсүһүүбүтүн күндүтүк саныыбын".

Дария Соловьева, ХИНТуоКИ 4-с кууруһун устудьуона:​ "Олимпиадаҕа кыттыыбыт таһынан элбэх кэрэ сири көрдүбүт. Ол курдук, Чемалга «Тарзанка» диэн аттракциоҥҥа ыстаммытым дьиҥнээх экстрим этэ. Онтон Телецкай күөлгэ Корбу күрүлгэни уонна киһи сирэйин моһуонун көрбүппүт. Түүр тыллаах, биһигини кытта уруулуу культуралаах омук оҕолорун кытта доҕордоспуппуттан дьоллоохпун".