Рестораннарга уонна кафеларга табах кальяныттан, пепельницаттан аккаастаныахтара. Тэрилтэ истиэнэтигэр бобор бэлиэлэри туруоруохтара.

Салгын толору киирэр сайыҥҥы верандаларга эрэ табахтыахха сөп буолла.

Дьон мустан аһыыр сиригэр табахтаабыттар 500-тэн 1,5 тыһ. солк. диэри ыстыраабы төлүөхтэрэ, тэрилтэ салайааччыта 30-40 тыһ.солк., оттон юридическай сирэйдэр 50-тан 90 тыһ.солк. диэри.

Саҥа сокуонунан маҕаһыын долбуурдарыттан табаҕы хомуйуохтара. Атыылаһааччыга каталог бэриллиэҕэ. Ларектарга, киоскаларга табах атыыта эмиэ тохтотуллар.

Рекламаҕа сокуон ыстатыйалара эмиэ дьайаллар.

Сокуон бастакы түһүмэҕэ 2013 сыл бэс ыйын 1 күнүттэн ыла күүһүгэр киирбитэ. Манна этиллибитинэн үөрэх, культура, спорт тэрилтэлэригэр, сөтүөлүүр сиргэ, стадиоҥҥа, оҕо оонньуур площадкатыгар, самолекка, метроҕа, уопсастыбаннай тырааныспарга, хонтуораларга, салгын киирэр сирэ суох офистарга табахтыыры боппуттара.