Урут куоракка хонуу сибэккитэ үүнэрин өйдөөбөппүн. Аҕыйах сылтан бэттэх мас олордоллоругар буорун кытта түөрэн аҕалалларыгар ол сибэккилэр ойууртан кэлсибиттэр. Уонна барахсаттар кып-кыра сиртэн саҕалаан сылтан сыл сиэмэлэрин ыһан, элбээн барбыттар. Преображенскай таҥара дьиэтин таһыгар ап-араҕас көбүөр курдук тэлгэнэ үүммүттэр, ааһан истэххэ, мип-минньигэс сыта саба биэрэр. Үчүгэйин!

От-мас чэлгийэ үүнэр кэмэ буолан, куораппыт тупсан аҕай турар. Сотору хап-халыҥ быылынан бүрүллүө да буоллар... Кэлии дьон наар куораппытыгар күөҕэ тиийбэтин бэлиэтии көрөллөр. Кырдьык, атын куораттарга холоотоххо, ото-маһа аҕыйах. Ону куорат дьаһалтата: "Сыл аайы мөлүйүөнүнэн үп көрөбүт да, буора туустаах буолан, сатаан үүммэт" диэн куотунар. Ол иһин наар талымаһа суох иирэлэри үүннэрэллэр этэ. Ол түүтэ бурҕаҥныы көтөр.

Ити этэллэрин мин утарабын. Куораты көҕөрдүүгэ, былааннаах үлэ, кыһамньылаах көрүү-истии суох диэн этэбин. Тополь курдук соҕурууҥу мастар быыстаан да буоллар, үүнэн тураллар (холобур, 1 поликлиника аттыгар, пааркаҕа, о.д.а.). Итинник мастартан аллея оҥордоххо, төһөлөөх кыраһыабай буолуо этэй?

Дөлүһүөнү биир сквергэ элбэхтик үүннэрэн баран, тыллар кэмигэр били, дьоппуоннар сакуралара тылларын бырааһынньык оҥорбуттарын курдук, дьон ону көрөөрү, кэрэҕэ кыттыһаары кэлэр, туристар сылдьар, кэрэ миэстэлэригэр кубулутуохха сөп эбээт. Ол сад (чэ, сквер да буоллун) куорат биир кэрэ-бэлиэ миэстэтигэр (достопримечательность) кубулуйуо этэ.

Кэнники хатыҥ, харыйа, бэс мастары олорпуттара бэркэ үүнэн эрэллэрин көрөбүт. Хатыҥ барахсан үрүҥ субата кылбайан, куудара баттаҕа тыалга тэлибирээн, чэчир анньан үүнэн дьороһон туралларын көрөн сүрэх үөрэр (Эргэ куоракка, баан аттынан, о.д.а.). Правительство дьиэтин аттыгар аарыма хатыҥнар үүнэн тураллар. Оо, арай куораппыт хатыҥ чараҥынан сууланнын?

Хатыҥ Дьокуускай куоракка үүнэр кыахтааҕын көрдөрдө. Бастаан олордорго буорун кытта түөрэн аҕалыахха, бастаан утаа уу кутуохха эрэ наада. Хатыҥ мас көстүүтэ эрэ кыраһыабай буолбатах, энергетиката үчүгэй, сырдык, уонна  ыраастыыр, арчылыыр айылгылаах. Онон Дьокуускайбыт атын куораттартан хаалсыбат куорат-сад буоларыгар баҕарабын! Хас ыраас сир ахсын хатыҥна үүннэрэн иһиэххэ, тэрилтэлэри, биирдиилээн дьону, устудьуоннары, оскуола оҕолорун сыһыаран көрүүгэ-харайыыга көмөлөһүннэриэххэ, оччоҕо мас ахсаана сылтан сыл элбээн иһиэ. Аҕыйах сылынан хахыйахтар өрө хороһон тахсыахтара, куораты быылтан, тыастан-уустан, күн уотуттан харыстыахтара.

Тоҕо сатаммат буолуой? Мирнэйгэ, Нерюнгрига сатаммыт дии. Соторутааҕыта телевидениеҕэ көрдөрбүттэригэр, кимнээх эрэ түөрт маһы суулларбыттар, онно олохтоохтор айманан турбуттар. "Аҕа көлүөнэ куорат күөх буоллун диэн тыһыынчанан маһы олорпута, көлөһүнүн тохпута, ону сыаналаабат буолбуттар" диэн айманаллар. Маһы алдьаппыт дьону көрдөөһүн саҕаламмыт. Ол курдук хас биирдии мастарын харыстыыллар.

Оттон биһиэхэ, хомойуох иһин, сүүрбэччэ сыл үүммүт, 7-8 миэтэрэ үрдүктээх хатыҥнары кэрдэн, уулуссаны кэҥэтэбит диэн ааттаан, суох гыммыттара. Бу хаартыскаларга 2011 сыллаахха Киров уулуссатын кэҥэтээри хатыҥ чараҥы кэрдэ туралларын көрөҕүт. Бу хатыҥнартан билигин биир да суох. Хаһааҥҥа диэри маннык сыһыаннаһабыт?!.