Онно биир сүрүн төрүөтүнэн полиция профессиональнай таһымҥа тахсыыта уонна саҥа технологияны туттуу буолла. Дьокуускайга "Куттала суох куорат" диэн ааттаах полиция кэтиир-маныыр систиэмэтэ үлэлиир.  Бүгүҥҥү күҥҥэ 86 камера уулуссалары, болуоссаттары суукканы эргиччи кэтиир. Итини сэргэ 8 сиргэ "Гражданин полиция" диэн ис дьыала уорганнарын үлэһиттэрин суһаллык ыҥырар кунуопкалаах аппарат турар. Көстөн туран эрэ кунуопканы баттаан  полицияны кытта быһа сибээскэ тахсаҕын. Камера туһатын туһунан Дьокуускай куораттааҕы полиция салалтатын салайааччыта, полковник Николай Кульбертинов сырдатта: 

- Сэтинньи 6 күнүгэр Дьокуускайга Автодорожнай уулуссаҕа операторы өлөрөн, заправканы халаабыттара. Биһиги сыщиктарбыт буруйдаахтары булбуттара. Онуоха камералар олус туһалаабыттара. Быйыл 10 ый түмүгүнэн, камера көмөтүнэн 99 буруйу оҥорууну арыйдыбыт.

Сыыппаралар

Камера көмөтүнэн буруйдаах сирэйин, таҥаһын-сабын көрөбүт диэн иһитиннэрэр. Ол арыллыбыт 99 буруйга -- 35 киһи доруобуйатын улаханнык эчэтии, 27 тиэхиникэни уоруу, 17 халааһын, 3 күүһүлээһин о.д.а. киирсэллэр. Ити чахчылары учуоттаан туран, Саха сиригэр кэлин полиция үлэтэ күүһүрдэ диэххэ сөп.

Министиэристибэ санаата

Ону СӨ ис дьыала миниистирин солбуйааччы Константин Неустроев эмиэ бигэргэтэр:

-- Бу кэлиҥҥи уон сылга Саха сиригэр ис дьыала уоргана ыарахан буруйу арыйыынан Россия үрдүнэн 5 бастыҥ ортотугар киирдэ. Аҥардас дьыаланы арыйыынан эрэ буолбакка, дьыаланы суукка тиэрдии ахсаанынан биэс иһигэр киирдэ. Манна даҕатан эттэххэ, кэлин өрөспүүбүлүкэҕэ буруйу оҥоруу аччааһына аҥардас полиция эрэ үлэтэ күүһүрбүтүттэн диир табыллыбат. Бу ситиһии өрөспүүбүлүкэ общественноһа, салалтата, депутаттара үлэлэрин түмүгүнэн буолар. Итиэннэ, кэлин уопсастыба өйө-санаата уларыйыыта эмиэ буруй аччааһыныгар төһүү күүс буолла. Ити барыта биир сыллаах үлэ буолбатах, ити элбэх сыллаах улахан, уопсай үлэбит буолар.