Эдэркээн баһылык Гаврил Леонидович Яковлев салайар Элгээйи нэһилиэгэ сэлиэнньэ сайдыытыгар урукку көлүөнэ үлэлээн-хамсаан, айан-тутан ааспытын утумнаан, аныгы тэтимнээх сайдыы ирдэбиллэригэр сөп түбэһиннэрэн үлэлии-хамсыы олорор.

Кулун тутар 23-24 күннэригэр Дьокуускай куоракка Элгээйи нэһилиэгин күннэрэ ыытыллыахтара. Күннэр Элгээйитээҕи Айылҕа музейын төрүттээбит кыраайы үөрэтээччи, учуонай-натуралист, РСФСР үтүөлээх учуутала, САССР культуратын үтүөлээх деятелэ, Октябрьскай революция уордьан кавалера Борис Николаевич Андреев төрөөбүтэ 100 сылыгар, норуот ырыаһыта Сергей Зверев-Кыыл Уола төрөөбүтэ 115 сылыгар ананаллар.

СӨ Тыа хаһаайыстыбатыгар уонна ас үөл политикатыгар министерствотыгар «Элгээйи сэлиэнньэтигэр агрокластеры тэрийии», СӨ Олоҕу-дьаһаҕы хааччыйар коммунальнай хаһаайыстыбаҕа уонна энергетикаҕа министерствотыгар «Элгээйи нэһилиэнньэтин сылы быһа уунан хааччыйыы уонна сэлиэнньэҕэ толору хааччыллыылаах дьиэлэри тутуу» бырайыактарынан көрсүһүүлэр буолуохтара.

Кыраайы үөрэтээччи Борис Андреев төрөөбүтэ 100 сылыгар анаан Дьокуускай куорат 2№-дээх политехническэй оскуолатыгар экологтар өрөспүүбүлүкэтээҕи научнай-практическай конференциялара, ХИФУ естественнэй наукаларга институтугар өрөспүүбүлүкэтээҕи «Андреевскай ааҕыылар» тэриллиэхтэрэ.

Элгээйи нэһилиэгиттэн кэлбит делегция Дьокуускай куоракка олорор биир дойдулаах активистарын кытта «Төгүрүк остуолга» түмсэн «2012 сылга диэри Элгээйи нэһилиэгин сайдыытын суоллара уонна стратегията» боппуруос тула санааларын атастаһыахтара. Элгээйиттэн Дьокуускай үөрэнэр устудьуоннары кытта көрсүһүү тэриллиэҕэ.

Күннэри түмүктүүр дьоро киэһэ кулун тутар 29 күнүгэр Кулаковскай аатынан культура киинигэр буолуоҕа. Элгээйиттэн ырыа-тойук, үҥкүү-битии кэһиилээх уус-уран самодеятельность кыттыылаахтара «Эйэҕэс, эриэккэс сааһынан Элгээйи сириттэн эҕэрдэ» улахан кэнсиэри биэриэхтэрэ. Биир дойдулаахтар көрсүһэр иһирэх киэһэлэригэр элгээйилии эһиэкэй дьиэрэйиэ, үҥкүү-битии оройуттан тутуллуо.