“Ньурба оройуона” МТ пресс-сулууспатыттан Саргылаана Федорова-Васильева СИА корреспонденыгар иһитиннэрбитинэн, улуус 190 сылыгар ананар тэрээһиҥҥэ анал хамыыһыйа 2013 сылтан тиһиктээхтик үлэлээбит. Онно олоҕуран Дьокуускайга улуус күннэрин тэрийэн ыытыы бырагыраамата бигэргэтиллибит.

- Бүгүн Емельян Ярославскай аатынан Хотугу норуоттар историяларын уонна культураларын музейыгар Ньурба улууһун музейдарын холбоһуктаах быыстапкалара буолла. Улуус сиригэр-уотугар көстүбүт былыргы ураты булумньулар хото туруорулуннулар. Уопсайа 100-тэн тахса экспонат дьон-сэргэ көрүүтүгэр-истиитигэр таҕыста, - диэтэ кини. Сэдэх булумньулары көрөөрү музейга 70-тан тахса ыалдьыт сылдьыбыт. Экспонаттар бу ый 13 күнүгэр диэри көрдөрүүгэ туруоруллуохтара. Маны сэргэ, национальнай архыыпка улуус төрүттэниитин кэрэһилиир докумуоннарынан экскурсия саҕаламмыт.

Ньурба оройуонун күннэрин официальнайдык аһыы ахсынньы 11 күнүгэр Былатыан Ойуунускай аатынан Саха академическай драматическай театрыгар буолуоҕа. Бу күн суон сурахтаах Ньурбатааҕы көһө сылдьар государственнай театр артыыстара «Ньырбакаан» испэктээкили көрдөрүөхтэрэ.

Маны сэргэ министиэристибэлэри кытта бииргэ үлэлээһиҥҥэ сөбүлэһиилэр түһэрсиллиэхтэрэ. Улуустан төрүттээх ытык кырдьаҕастары, бэтэрээннэри, Ил Түмэн депутаттарын, учуонайдары, устудьуоннары кытта истиҥ көрсүһүүлэр буолуохтара. Оттон ахсынньы 13 күнүгэр “Арчы” дьиэтигэр «Оһуохай уҕараабат тэтимэ – саха омук быстыбат ситимэ» оһуохай тэриллиэ. “Сайсары» ырыынакка тыа хаһаайыстыбатын бородууксуйатын атыыта дэлэччи тардыллыа.

Ньурба оройуонун күннэрэ ахсынньы 14-гэр Суорун Омоллоон аатынан Опера уонна балет государственнай театрыгар “Уостубат уйгубут – биһиги Ньурбабыт» улахан кэнсиэринэн түмүктэниэхтэрэ.