Хамыыһыйаҕа Ил Тумэн дьокутааттара, баһылык солбуйааччылара, улуус бары салааларын салайааччылара киирбиттэрэ. Б.Н. Попов уурааҕар нэһилиэк баһылыктарын, тэрилтэ салайааччыларын «Ньурба оройуонун күннэрин» тэрээһинигэр уонна ыытыллыытыгар көхтөөхтүк кытталларыгар ыҥырда.

      Ньурба күннэрин тэрийэр хамыыһыйа үлэтин саҕалаабыта ыраатта. Тэрээһиннэр сүрүн былааннара билигин торумнана сылдьар, куорат тэрилтэлэрин кытары быыстапкалар, презентациялар, кэнсиэрдэр, күрэхтэр уонна да атын тэрээһиннэр ыытыллар миэстэлэрин кэпсэтии үлэтэ бара турар. Ону таһынан, үп-харчы тыырыллар. Барыллаан былааҥҥа Ньурба музейдарын холбоһук быыстапкалара, архыып көрдөрүнньүк истендэлэрэ, нэһилиэктэр куоракка олорор биир дойдулаахтарын кытары көрсүһүүлэрэ, министиэристибэлэри кытары бииргэ үлэлиир туһунан сөбүлэһии-дуогабардардары түһэрсии, эдэр ыччакка араас хабааннаах күрэстэр, презентациялар, атыы-эргиэн быыстапка-дьаарбаҥкалара, кэнсиэрдэр, Ньурба театырын испиктээкиллэрэ уонна да атын тэрээһиннэр киирдилэр. «Саха» НКИК ханаалыгар Ньурба дьоно ылдьыттыахтара, оройуон олоҕун киэнник сырдатыы үлэтэ ыытыллыаҕа. Өрөспүүбүлүкэ хаһыаттарыгар улуус олоҕун, дьонун сырдатар араас матырыйааллар тахсыахтара.

        Бу кун оройуон баьылыгын солбуйааччыта С.Б. Дондокова уонна култуура управлениятын начальнигын солбуйааччыта Н.В. Матвеева салайааччылаах хамыыһыйа үлэтин номнуо саҕалаата. Кинилэр Дьокуускайга баар биир дойдулаахтарын кытары көрүстүлэр, тэрээһин үлэ сүрүн хайысхаларын былааннаатылар. Дьокуускай куоракка ыытыллар «Ньурба оройуонун күннэрин» бары күүһү холбоон, үрдук таһымҥа ыытар туһунан сүбэлэстилэр.