Дьокуускай Покровскайдыыр суолун 15 км. бэс чагда ортотугар өссө 70-с сылларга сэбиэскэй кэм саҕана тутуллубут, кэлиҥҥи кэмҥэ быраҕыллан турбут лааҕыры үлэ, социальнай сайдыы министиэристибэтэ саҥардан оҥорбута. Манна элбэх оҕолоох ыал, олохторугар ыарахан быһыыга-майгыга түбэспит оҕолор сынньанар кыахтаахтар. Социальнай-реабилитационнай киин үлэни сүрүннүүр.

«Быйыл биһиги иккис сылбытын үлэлиибит. Олорор дьиэ, остолобуой, кулууп барыта автономнай ититиилээх. Корпустар барыта мультимедийнай тэриллээхтэр. Лааҕыры күнүстэри-түүннэри харабыллыыллар. Иитээччилэр бука бары кытаанах куонкуруһу ааспыттара», – диэн СИА-ҕа эттэ лааҕыр начальнига Зоя Пестрякова.

Манна барыта 50 киһи үлэлиир, ол иһигэр 29 уһуйааччы. Иитээччилэр сорохторо албан ааттаах «Орленок» лааҕырга стажеровкаламмыттар.

«Мин 17 сыл устата оҕо лааҕырдарыгар үлэлиибин. Биһиги үлэбит бырагыраамата хатыламмат, ураты. Атыттары үтүктүбэппит, бэйэбит айан, толкуйдаан таһаарабыт. Хас биирдии оҕо бэйэтин уратылаах курдук сананарыгар, үтүөҕэ, кэрэҕэ аһылларыгар дьулуһан туран үлэлиибит», - диэн СИА-ҕа эттэ иитэр үлэҕэ начальнигы солбуйааччы Андрей Попов.

Оҕолор биэстэ аһыыллар. Бурдук ас, фрукта күннээҕи астарын арыыһыгар куруук баар. Оҕону чэбдигирдэргэ, доруобуйатын тупсарарга эмиэ атыттарга майгыннаабат  бырагырааманан үлэлииллэр.

Горнай Бэрдьигэстээҕиттэн лааҕырга сынньана кэлбит 13 саастаах  Милена Ивановаттан «Ыра санааҥ тугуй?» диэн ыйытыкпытыгар  «Дьон элбэх буолуон баҕарабын», - диэн хоруйдаата. Кини сотрутааҥҥыта ийэтэ өлбүт. «Мин кыра бырааттаахпын уонна балыстаахпын. Кинилэри атахтарыгар туруоруохтаахпын», - диэн эбэн эттэ. Уус-Маайаттан кэлбит 14 саастаах Костя Джанкабулов үлэ миниистирэ буолар ыра санаалаах. «Тоҕо диэтэххэ, кини дьоҥҥо үлэни биэрэр, оттон биһиэхэ үлэ аҕыйах», – диир кини.  

Эдэр баһаатайдар театрализованнай туруорууларын оҕолор ытыстарын күүскэ таһынан, олус сөбүлээбиттэрин биллэрдилэр.