«Саха сирин доруобуйа харыстабылыгар министиэристибэтэ уонна "Ростехнологии" госкорпорация дуогабары түһэрсибиттэр. Перинатальнай киин былаан быһыытынан 2016 сылга үлэҕэ киириэхтээх», - диэтэ Норуот фронун штабын хос бэрэссэдээтэлэ Алена Атласова.

Уопсастыбаннай хамсааһын тутуу түһүмэҕин барытын хонтуруоллуоҕа.

«Саамай сүрүнэ киин хаачыстыбалаахтык тутуллубут, аныгы медицинскэй тиэхиньикэнэн ситэриллибит буолуохтаах уонна былааннаммыт кэмигэр үлэҕэ киириэхтээх», - диэтэ А. Атласова.

РФ счетнай палаатата быһаарбытынан, маннык кииннэри тутууга анаммыт 52 млрд солк. кээмэйдээх үп-харчы регионнарга олус хойутаан тиийбит. Саха сиригэр ити харчы 2014 сыл бэс ыйын 2 уонна 17 күннэригэр кэлбит.

«Доруобуйа» тутулуга суох фонда (салайааччы норуот фронун киин штабын чилиэнэ Эдуард Гаврилов) чинчийиитэ, үөрэтиитэ көрдөрбүтүнэн, кииннэри тутууга анаммыт үп-харчы регионнарга муус устар ыйга эрэ тиийбит, оттон бырайыактыыр докумуон от ыйын 1 күнүгэр бэлэм буолара ирдэниллэр.

Саха Республиката наадалаах докумуону барытын бэлэмнээбит.

Былырыын РФ президенэ Владимир Путин ыам ыйыгар саҥа төрүүр оҕо өлүүтүн аччатар соругу туруорбута. «Доруобуйа» национальнай бырайыак чэрчитинэн Россия регионнарыгар перинатальнай кииннэр тутуллаллар. 2007-2012 сылларга 2 федеральнай, 22 регионнааҕы кииннэр баар буолбуттар уонна медицинскэй тиэхиньикэнэн хааччыллыбыттар.