Сыл саҕаланыаҕыттан ыла Дьокуускай куоракка мас дьиэлэр сотору-сотору умайыылара үксээтэ. Ол курдук, сыл аҥаара кэм иһигэр 27 быһылааҥҥа түөрт киһи олоҕо быстыбыта, кинилэр ортолоругар биир оҕо. Уоттан биэс киһи эмсэҕэлээбитэ.

Россия ИДьМ «Дьокуускайдааҕы» силиэстийэлиир управлениетыгар 14 матырыйаал киирбитэ, бэрэбиэркэлээһин түмүгэр алта холуобунай дьыала тэриллбитэ. Итинтэн иккитигэр - Кальвица уонна Федор Попов аатынан уулуссаларга дьиэни соруйан сорунан туран умаппыттара биллибитэ.

«Баһаарга араас барыйааны, ол иһигэр дьиэни тутааччылар кыттыгастаахтарын дуу, суоҕун дуу мэлдьи ырытабыт. Дьиэни уматааччы ким эрэ интэриэһин, ханнык эрэ түмүгү ылары өрө тутар. Биһиэхэ киирбит дьыалаларга тутааччы интэриэһэ баара бэлиэтэммэтэҕэ», - диэтэБурнашев.

Куорат дьоно-сэргэтэ мас дьиэлэри соруйан уоттааһын бизнескэ барыстаах диэн элбэхтэ сайабылыанньа киллэрэллэр. Кырдьык, умайбыт дьиэлэр оннуларыгар атыы-эргиэн кииннэрэ эбэтэр саҥа дьиэ тута тутуллубутунан барар.

"Мас дьиэлэри уматыы куорат дьаһалтатыгар да, тутааччыга да барыһа суох. Хас биирдии дьиэ бас билээччилээх. Дьиэтэ умайбыт буоллаҕына, киниэхэ атын дьиэ бэриллэр. Дьиэ сирин учаастага кимиэхэ эрэ бэриллибэт. Дьон элбэх мэктиэлээх», - диэтэ куорат дьаһалтатын олорор дьиэ департаменын салайааччыта  Игорь Ткаченко.

«Дзержинскэй аатынан уулусса 11-гэр баар дьиэ умайбытын умнубаппыт. Онно уокка дьон олоҕо быстыбата. Быһылаан буолуон аҕай иннинэ олохтоох дьон бары кэриэтэ көһөрүллүбүттэрэ. Үс квартира олохтоохторо дьиэлэриттэн көһүөхтэрин баҕарбатахтара. Тутааччы соруйан баһаары оҥорбута быһаарыллыбатаҕа да, дакаастамматаҕа да», - диэтэ Ткаченко.

Мас дьиэ испиискэ хоруопкатын курдук түргэнник умайарын туһунан идэлээх дьон этэллэр. Дьиэ туохтан умайбытын быһаарар олус уустук. Иэдээн биир үксүн киһи дьалаҕай туттунуутуттан, куттал суох буолуутун быраабылатын тутуспатыттан тахсар. «Мас дьиэлэргэ электропроводка эргэриитэ уот туруутун сүрүн төрүөтүнэн буолар. Кладовкалар үгүстүк умайыылара дьиэ уокка былдьаныытыгар тиэрдэр. Итинник 33 түбэлтэ бэлиэтэммитэ. Сорунан туран уматыыны дакаастыыр уустук, дьон эрдэттэн буруйу оҥорууга бэлэмнэнэр», - диэтэ Россия ЫБММ администартивнай практика отделын начальнига Августина Слепцова.