2010 сылтан дьоҕус бизнескэ ылсарга санаммыт. Былырыын 6х9 иэннээх мастарыскыай туттубут. Бу киэҥ-куоҥ дьиэҕэ Степан Син-Хой быһах, миэбэл, дэйбиир, тэрилтэлэргэ аан, түннүк холуодата оҥорор. Кэлиҥҥи кэмҥэ тэрилтэлэр люминицентнай лаампалары харайар дьааһыктары сакаастыыр буолбуттар. Ирдэбил быһыытынан, куоракка илдьэн туттараллар эбит. “Онон эбии харчыны булар үлэни олох бэйэтэ ыйан биэрэр”,-- диэн этэр Степан.

Уопсайынан, Ыстапаан түбүгэ үгүс. Биирин бүтэрдэҕинэ, атына тахсан кэлэр. Ол эбэтэр миэбэлин сакааһын туттарда да, тимиригэр көһөр, ол бүттэҕинэ дэйбиирэ кэлэр. Онон күн солото суох киһи.

Мин мастырыскыайын оһоҕун сэргии көрдүм. Тимир ууһа диэх курдук, бэйэтэ иһэрдэн оҥорбут. Бу былыргылыы “бурутуу” оһох моһуона. Буруону буруйар (дымоход) иккис оһох сылааһы биэрэр. Онон икки оһох тэҥҥэ үлэлиир курдук буолан, дьиэ иһигэр сылааһы тутар.

Предприниматель тэрилиттэн көрдөххө, атаҕар турбут кэриҥнээх. “Бастаан утаа маспын сүкпүтүнэн: “Баһаалыста, эрбээн эбэтэр чочуйан кулуҥ эрэ”, -- диэн дьон илиитин-атаҕын маныыр этим. Онтон кэһэйэн бэйэм тэрил атыыласпытым, билигин санаабыт тэрилим барыта баар”, -- диэн санаатын үллэстэр предприниматель. Олохтоох предпринимательствоны өйүүр салааны кытта ыкса үлэлэһэр буолан, предпринимателлэр өйөбүллэрин фондатыттан субсидия ылан, наадыйар тэриллэрин атыыласпыт. Онон Ыстапаан тэрилтэтин кэҥэтэн, аны дьиэ кэргэнинэн бииргэ үлэлэһэр былааннаах. Ол курдук, кэргэнэ Татьяна иистэнэр, атах таҥаһын улларар, асчыт бэрдэ эбит. Уолаттара эмиэ маска сыстаҕас буолан, сатаабаттара диэн суох. Кыыс уруһуйдьут ааттааҕа. Онон бу дьиэ кэргэн норуот уус-уран оҥоһуктарын оҥорууга дьоҕус бизнеһи лаппа кэҥэтэр былааннаахтар.

“Мин билигин 52-гэрсылдьабын. Бу эр киһиэхэ саас буолбатах. Олоҕуҥ орто омурҕана – саамай кыайар-тутар, муудараһыҥ кэлэр кэмэ эбит. Мин билигин да бэйэбин көрдөнө сылдьабын. Тугу эрэ өссө оҥоруохтаахпар тиийэ илик курдукпун. Ол иһин Мандар Ууска тиийэн анаан үөрэммитим. Үчүгэйэ диэн, саҕалаабыт үлэбин тиһэҕэр тиэрдэн тэйэбин. Онтон атын “бэйэбин көрдөнөбүн” диэн барытыгар сатаҕайдык сыһыаннаһыам эбитэ буолуо. Ардыгар утуйбат буолан хаалабын, айар үлэ умсулҕаныгар ылларан, мастырыскыайбар киирэн уһаныы бөҕөтүн уһанааччыбын. Ол турукка киирии эбит. Кэлин: “Бу туох ааттаах буоллум?” – диэн төрүччүбүн үөрэтэн көрбүтүм, Чап уустарыттан төрүттээх эбиппин. Хос эһэм Кэнтиккэ Чап нэһилиэгэр кинээстии олорбут, ааттаах-суоллаах тимир ууһа эбит”, -- диэн кэпсиир Степан Син-Хой.

Кырдьык да, Үөһээ Бүлүү предпринимателин үлэлэрин көрө сылдьан, төрүт уус тардыытын күүһэ баар эбит ээ диэн санааҕа кэлэҕин.