Юка мамонт оҕотун таһынан атын экспонаттар эмиэ туруоруллуохтара. Ол курдук, быыстапкаҕа кэлбит дьон Чурапчы мамонын дьардьаматын, тириитин, аһыытын, атаҕын, о.д.а. уҥуохтарын көрүөхтэрэ.

Юка мамонт оҕото Усуйаана улууһугар Лаптевтар муораларын таһыгар көстүбүтэ. Палеонтологтар этэллэринэн, 6-11 диэри саастаах тыһы мамонт 39 тыһыынча сыл анараа өттүгэр олоро сылдьыбыта быһаарыллыбыт. Юка мамонт тириитэ, мэйиитэ кэм-кэрдии устата уларыйбатах. Тириитигэр адьырҕа кыыл тыҥыраҕын суола хаалбыт.

Палеонтологическай быыстапка Нуучча географическай уопсастыбатын Приморскай кыраайдааҕы отделениетын 130 сылыгар ананар, РФ-ҕа культура сыла биллэриллибитигэр сыһыары тутулар. Быыстапка от ыйын 4 күнүттэн балаҕан ыйын 10-гар диэри туруоҕа.