Өссө 1982 сыллаахха Чингиз Айтматов айымньытынан туруоруллубут «Хаарыан хампа күөх кытылым» испиктээкил Андрей Борисов дипломнай үлэтэ эрэ буолбатах, кини аан бастаан режиссер быһыытынан холонуута этэ. Былатыан Ойуунускай аатынан Саха академическай театрын инники күөнүгэр тутуллар чулуу туруоруута диэн эбэн биэриэххэ сөп.

«Науруз» форум быйыл аан бастакытын «Сиэр-туом — театр сүрүн сүнньэ» диэн ис хоһоонноохтук барда. «Хаарыан хампа күөх кытылым» - сиэр-туом театрын бастыҥ холобура. Манна Амур өрүс кытылыгар уонна Сахалиҥҥа олохсуйбут эйэ дэмнээх нивх норуота ойууттар нөҥүө сырдык уонна хара иччигэ, күүскэ итэҕэйиитэ уонна хардарыта дьайсыыта тыктарыллар.

Манна ойууланан көстөр муора балыксыттара — Чингиз Айтматов айымньытыгар сүрүн миэстэни ылаллар.