«Саха сирин норуоттарын спортивнай оонньуулара, чахчыта да, улуус социальнай-экономическай сайдыытыгар акылааты уурар. Спорт, дьиэ-уот коммунальнай хаһаайыстыба эбийиэктэрэ өрөмүөннэнэллэр, саҥардыллаллар, тутуллаллар. Ити массыына суолугар эмиэ сыһыаннаах», - диэтэ суруналыыстары кытта көрсүһүүгэ спортивнай оонньууну тэрийэр кэмитиэт бэрэссэдээтэлэ  Дмитрий Глушко.

Быйыл Саха сирин норуоттарын спортивнай оонньуулара Намҥа ыытыллар. Ол чэрчитинэн сири-уоту тупсарыыга кэлимсэ үлэ барда. Элбэхтэн биири холобур быһыытынан аҕаллахха, скважинаҕа насос станциятын өрөмүөннээтилэр. Онно ыраас ууну бытыылкаларга кутар сыаҕы хос туруордулар.

Спортивнай оонньуу аһыллыытыгар 3D-технологияны туһаныахтара, ыалдьыттарга онно кэтиллэр ачыкылары түҥэтиэхтэрэ. Быйылгы оонньууга аан бастакытын оҕолор кыттыахтара.