Эмтиир физкультура уонна спортивнай медицина өрөспүүбүлүкэтээҕи киинин кылаабынай бырааһа, Намнааҕы оонньууларга медицинскэй өҥөнөн хааччыйыыга кылаабынай судьуйаны солбуйааччы Күннэй Назарова иһитиннэрбитинэн, 15 спортивнай быраас үлэлиэҕэ. Кинилэр бастакы көмөнү оҥороллорун сэргэ спортсменнар аһылыктарын уонна үлэлиир, олорор усулуобуйа хаачыстыбатын хонтуруоллуохтара.
СӨ доруобуйа харыстабылын министрэ Александр Горохов бирикээһинэн, Спортивнай оонньуулар кэмнэригэр саахал медицинатын өрөспүүбүлүкэтээҕи киинин мобильнай госпитала (салайааччы – кылаабынай бырааһы солбуйааччы Иосиф Олесов) үлэлиэҕэ. Госпитальга тыҥа көһө сылдьар искусственай вентиляциялара, организм үлэтин кэтээн көрөр аппаратуралар, о.д.а. баар буолуохтара. Биригээдэҕэ анестезиолог-реаниматолог, нейрохирург, хирург, икки фельдшер уонна саахала медицинатын киинин суоппара үлэлиэхтэрэ. Маҕан пордугар «Ми-2» санитарнай вертолет дьуһуурустубаҕа туруоҕа.
Ону таһынан, анал мобильнай биригээдэлэр Нам улууһунааҕы киин балыыһаҕа тэрилиннилэр. Киин балыыһа кылаабынай бырааһа Леонид Слепцов барыта 13 медицинскэй пуун тэриллэрин, 38 быраас, 20 фельдшер уонна 30 медицинскэй сиэстэрэ үлэлиэхтээхтэрин туһунан иһитиннэрдэ. Оонньуулар хаһаайыттара 3660 спортсмены уонна кыттыылаахтары 24 пууҥҥа олохтуохтара. Намнааҕы киин балыыһаҕа улахан киһи, оҕо хирургиятын, травматология, инфекционнай, неврология, трансфузиология уонна реанимация биригээдэлэрэ тэриллэллэрэ сабаҕаланар. Ону таһынан Нам, Хамаҕатта уонна Аппааны сэлиэнньэлэригэр мобильнай биригээдэ – икки сменанан, Нам суолун 52-с километрыгар мобильнай пуун суукканы быһа үлэлииргэ бэлэм буолуохтара.
СӨ доруобуйа харыстабылын министрэ Уус-Алдан, Хаҥалас, Мэҥэ-Хаҥалас уонна Чурапчы улуустааҕы киин балыыһалара эмиэ суһал медицинскэй көмө биригээдэлэрин тэрийэллэригэр сорудахтаата.
Комментарии
Авторизация на сайте через социальные сети