Кыһа сүрүннүүр эрэдээктэрэ Валерий Луковцев саха киэн туттар кинигэлэрин: «Саха ынаҕа – дар предков», «Күн Дьөһөгөй оҕото», «Узоры и орнаменты саха», «Сандалы народов Якутии», «Иллюстрированный атлас Республики Саха» о.д.а. библиотека фондатыгар бэлэх оҥорбута. Бу туһунан Казахстан библиотекатын сайтыгар суруллубутун үөрэ-көтө аахтыбыт. Саха литературатын быыстапкатыгар кэлиҥ, көрүҥ, сылдьыҥ диэн ыҥырбыттар. Өссө махтал сурук ыыппыттар.

Биллэрин курдук, саха биллиилээх суруйааччыта, бастакы романиһа Семен Степанович Яковлев-Эрилик Эристиин ааспыт үйэ 30-с сылларыгар Казахстаҥҥа, чуолаан Чимкент куоракка сыл кэриҥэ айар командировкаҕа сылдьыбыта, ол түмүгэр дьэ, киэҥник биллибит «Революция уолаттара» сэһэнэ күн сирин көрбүтэ. Бу атын омуктар дьылҕаларын сырдатар, хомоҕой сахалыы тылынан сэһэргиир аан бастакы бөдөҥ айымньы буолар. Онон, аатырбыт суруйааччыбыт Эрилик Эристиин сылдьыбыт аартыктарынан-суолларынан матырыйааллары булан билсэ, үөрэтэ «Бичик» кыһа Сүрүннүүр эрэдээктэрэ Валерий Луковцев ыам ыйын 24-26 күннэригэр Казахстаҥҥа баран кэлбитэ.

Өссө Семен, Софрон Даниловтар көҕүлээһиннэринэн, уруулуу тыллаах омуктарбыт бэйэлэрин дойдуларыгар Саха литературатын күннэрин ыыталлара. Казахстантан биллиилээх суруйааччы Калубек Турсункулов Саха сиригэр хаста даҕаны кэлэ сылдьыбыта. Оттон Саха сириттэн суруйааччылар Урсун, Софрон Данилов, Савва Тарасов кинигэ кыһатыттан Татьяна Румянцева көҕүлээһиннэринэн, хардарыта сибээстэһии, сырыы-айан буолуталыыра. Оттон биһиги уонча суруйааччыларбытыгар казахтар «Алаш» литературнай бириэмийэлэрэ анаммыта.

Валерий Николаевич Казахстаҥҥа тиийэ сылдьан Национальнай библиотекаларын генеральнай директорын Алибек Аскаровы көрсүбүтэ. Алма-Атаҕа сыл аайы улахан кинигэ быыстапката ыытыллар. Кыттыыга төлөбүрэ ыарахан буолан, дэбигис киһи тиийбэт. Ол иһин, биһиги бэйэбит таһаарбыт бастыҥ кинигэлэрбитин бу бөдөҥ быыстапка экспозициятыгар туруоруҥ диэн кини кинигэлэри бэлэх биэрбитэ.

Онон, күннээх Казахстан, истиэп олохтоохторо саха култууратын, төрүт үгэстэрин билсиэхтэрэ, хоту дойду хоһуун дьонун туһунан билиилэрин кэҥэтиэхтэрэ. Уруулуу тыллаах омуктар ити курдук бэйэ-бэйэбитин билсэн-көрсөн, саха кинигэтин киэҥ эйгэҕэ өссө да тарҕатан иһиэхпит. Тас дойдуга Сахабыт сирин имиджин көтөҕөргө, биллэн турар, ити дьоһун хардыы оҥоһулунна.