Итиэннэ талааннаах муосчуттар Степан Петров «Алгыс», «Саха боотура» диэн үлэлэрин, Николай Амыдаев, Терентий Аммосов муостан оҥоһуктарын көрүөххэ сөп.

Национальнай художественнай музей экскурсовода Елена Васильева быыстапка туһунан СИА корреспонденыгар бу курдук кэпсээтэ: «Саха биллиилээх худуоһунньуктарыттан үгүстэрэ айар үлэлэригэр Олоҥхо уонна өбүгэлэрбит төрүт култуураларын туһунан тиэмэни таарыйбыттара. Быыстапкаҕа араас көлүөнэ худуоһунньуктар үлэлэрэ туруорулуннулар. Былырыын биһиги музейбытыгар Киргизия национальнай художественнай музейын «Манас Великолепный» диэн быыстапката киэҥ көрүүгэ турбута. Быйыл биһиги Олоҥхо туһунан быыстапкабыт Киргизияҕа туруорулунна уонна бэйэбит музейбытыгар эмиэ таһаардыбыт».

Елена Васильева Национальнай художественнай музей аныгы технология көмөтүнэн үлэтин ис хоһоонун байытарын туһунан бэлиэтээтэ. «Быйыл саас ХИФУ иһинэн үлэлиир «Многомерные технологии» хампаанньаны кытары интерактивнай бырайыагы олоххо киллэрбиппит. Андроид базатыгар олоҕуран анал сыһыарыы арыйбыппыт. Бу сыһыарыы көмөтүнэн анимацияламмыт уонна муусуканан, тылынан-өһүнэн киэргэтиллибит хартыыналары телефонунан, планшетынан көрөрү ситистибит. Олонхоҕо анаабыт быыстапкабыт хартыыналарын эмиэ бу сыһыарыы көмөтүнэн көрүөххэ сөп. Холобура, Михаил Носов олоҥхоҕо уонна сахалар былыргы олохторугар-дьаһахтарыгар анаабыт хартыынатын орнамеҥҥа олоҕуран оҥорбут. Сыһыарыы нөҥүө бу хартыыналар киһи болҕомтотун тардардыы көстөллөр», – диэн кэпсээтэ Елена Васильева.