«Почта бастакы самолета Саха сиргэр кэлиитэ Иркутскай-Дьокуускай почта суола аһыллыбыт бэлиэ түгэнин кытта тэҥ суолталаах», – диэтэ бырабыыталыстыба бэрэссэдээтэлин солбуйааччы Александр Борисов.

Сыл устатыгар почта барбакка хаалыыта икки бүк аччаабыт. Биир сылга самолеттар Дьокуускайтан 181 рейси оҥорбуттар, уопсайа, 220 тонна баһыылканы тиэйбиттэр. Самолеттар өрөспүүбүлүкэ 21 оройуонугар көтөллөр. Киин куораттан чугас сытар улуустарга почта таһаҕаһа сиринэн тиийэр.

«Почта России» ФГУП генеральнай дириэктэрэ Дмитрий Страшнов 2018 сылга почта авиапаарката кэҥиэхтээҕин туһунан этэн турардаах. Бу тэрилтэ бэйэтин авиакомпаниятын тэрийбэт, манан аналлаах компаниялар дьарыктаныахтарын туһунан кини чиҥэтэн эттэ.