Афанасий Васильевич бэйэтин дьулуурдаах, таһаарыылаах үлэтин холобурунан элбэх оробуочайы уһуйбута. Бастыҥ үлэлээх производственниктар элбээн испиттэрэ. Анисим Дмитриевич Миронов, Егор Егорович Пахомов, Роман Ипатьевич Игнатьев, Алексей Гаврильевич Федоров сөҥүрдүү туус маастардарынан үрдүк таһаарыылаахтык үлэлээбиттэрэ.

А.В.Евсеев туус бассейнын көрүүгэ-харайыыга өр сыл үлэлээбит буолан, хаһан хаарын ыраастыыры, уутун түһэрэри, ханаабалары куурдары билэрэ. Ол иһин тууһу ылыы былаанын толороро. Оҕонньор үлэлиир тэрилэ атыттартан уратылаах. Хаары, тууһу баһар күрдьэҕэ дараҕар улахан буолааччы. Тачката 200 киилэлээх буолара. Ити 200 киилэ туус кутуллар тачкатынан үлүгэрдээх элбэх тууһу ыскылаакка бэйэтэ күрдьэҕинэн кутан таһаарара. Үлэтин кэнниттэн бултуурун, оҕуруот аһын үүннэрэрин сөбүлүүрэ. Хаһан да сылайбыта-элэйбитэ биллибэт этэ. Киэһэ 8-9 км күөлгэ сатыы баран, илим үтэн, сарсыарда эрдэ туран, улахан баҕайы сүгэһэрдээх балыктаан кэлэрэ. Үлэтигэр хойутаабакка үлэлээбитин курдук үлэлээн, нуорматын мэлдьи аһара толороро. Сэрии бириэмэтигэр саас харалдьык-ка туһах, куобахха сохсо иитэн, куруөөа эриэппэ ыһан, уолаттары-ныын баран, сүгэһэр муөунан бултаан кэлэллэрэ диэн олохтоохтор ахтан-санаан кэпсэтээччилэр.

Кини бириэмэни олус сатаан туһанар эбит. Кулуупка киинэҕэ мэлдьи сылдьара. Дойду, нэһилиэк социальнай-культурнай сайдыытын кыһалҕаларыгар боппуруоһу Үрдүкү Сэбиэт сессиятыгар тиийэ туруорсара. 1938 с. Саха АССР Үрдүкү Сэбиэтин депутатынан талыллан үлэлээбитэ.

Афанасий Евсеев 6 оҕолоох. Элбэх аймаҕы, урууну тэниппит оҕонньор буолар. Оҕолоро, сиэннэрэ бэйэтин утумнаан, бары даҕаны дьулуурдаах үлэһиттэр, булчуттар. Улахан уол Петр Афанасьевич күнүһү-түүнү аахсыбакка үлэлиир тракторист. Орто уол Николай Афанасьевич летчик идэлээх, «Килбиэннээх үлэтин иһин» мэтээллээх, авиация туйгуна, билигин бочуоттаах сынньалаҥҥа Москваҕа олорор. Куччугуй уол Ермак реставратор идэлээх, Москваҕа олорор. Кыыһа Мария Афанасьевна учуутал идэлээх, Кэмпэндээйи «Кэскил» музейын төрүттэспит. Бастакы сиэнэ Афанасий Викторович Евсеев - учуутал, СР үөрэҕириитин туйгуна, баянист, Сунтаар 1 №-дээх орто оскуолатыгар үлэлиир. Иккис сиэнэ Александр Викторович - суоппар идэлээх, туус собуотун чулуу үлэһитэ, билигин бочуоттаах сынньалаҥҥа олорор. Төрдүс сиэнэ Гаврил Герасимов Кэмпэндээйи нэһилиэгин баһылыга. Бэһис сиэнэ Николай Иннокентьевич сир үлэтин маастара. Хос-хос сиэннэриттэн Иннокентий Кэмпэндээйигэ айылҕа харыстабылын үлэһитэ. Эдуард Түбэй-Дьаархаҥҥа ветеринарнай быраас, Ксения Мэҥэ-Хаҥаласка Төҥүлүгэ кылаабынай бухгалтер. Үгүстэрэ ыал ийэлэрэ, эбэлэрэ.

1996 с. Афанасий Васильевич төрөөбүтэ 100 сылын бэлиэтииргэ «Кэскил» музей салайааччыта К.Евсеева, Кэмпэндээйи нэһилиэгин баһылыга А.Данилов көҕүлээһиннэринэн үбүлүөй тэриллибитэ. Олорбут дьиэтигэр мемориальнай дуоска туруоруллубута, кини аатынан уулусса баар буолбута.

Афанасий Васильевич олорон, үлэлээн-хамсаан ааспыт олоҕо умнуллубакка, үтүө аата ахтылла туруоҕа.