СИА-ҕа эрдэ суруйбуппут курдук, «Сибиир күүһэ» газ тиһигин турбатын Челябинскай собуотуттан аҕалбыттара. Бу баараҕай тутуу РФ биэс регионун хабар. Манна 12 тыһ. киһи  үлэлиэҕэ, тутуу уопсай суумата 25 млрд.доллар. Баайдаах сири туһаҕа таһаарыыны уонна Кытайга диэри тиэрдиини ааҕыстахха, 55 млрд. доллар.

Бүгүҥҥү туругунан Кытай 38 млрд. кубометр гааһы атыылаһар былааннаах.

400 млрд.доллар суумалаах 30 сыллаах хантараагы 2014 сыл ыам ыйыгар түһэрсибиттэрэ. 2017 сылга газ турба устун барыаҕа.

"Сибиир күүһэ" үлэлиир суоппардары, сыбааркаһыттары, о.д.а. номнуо үлэҕэ көрдөөн эрэллэр.

«Сибиир күүһэ» диэн ааты аан бастаан толкуйдуулларыгар интернеккэ куонкурус биллэрбиттэрэ. Манна 400-чэ этии киирбитэ. Онно "Восточная красавица", "Восточная экспансия", "Восточный генезис", "Голубой песец", "Дальний Путь", "Звездный путь" диэн ааттар бааллара. Бүтэһигэр "Сибиир күүһэ" диэни талбыттара.

Бастакы сүһүөҕү сыбааркалыырга РФ президенэ Владимир Путин, Газпром баһылыга Алексей Миллер, Саха сирин баһылыгын эбээһинэһин быстах кэмҥэ толорооччу  Егор Борисов, Кытай өрөспүүбүлүкэтин бэрэстэбиитэллэрэ Дьокуускайга кэллилэр.