«Газпроводу тутуу - турбаны тардыы эрэ буолбатах. Манна элбэх үлэ ыытыллыаҕа. Онон, дьоҕус уонна орто бизнес бэрэстэбиитэллэрэ сир баайын хостуур, туһаҕа таһаарар бөдөҥ компаниялары кытта үлэлиир кыахтаныахтара», - диэтэ Валерий Максимов.

«Тутуу саҕаланнаҕына, олохтоох компаниялар хос бэдэрээччит буолуохтарын сөп. Холобур, солооһуну оҥорорго, матырыйаалы тиэйиигэ, о.д.а. Тутуу биир эрэ сыл ыытыллыбат. Онон, турбаны кыйа вахтовай бөһүөлэктэр тутуллуохтара. Оробуочайдары аһатыахха наада буолуоҕа. Тыа хаһаайыстыбатын, тырааныспар дьоҕус тэрилтэлэригэр элбэх үбү-харчыны киллэриннэллэригэр кыах үөскүүр», - диэтэ промышленность миниистирэ Андрей Панов.

«Сибиир күүһэ» газопровод уһуна 3 968 км. Итинтэн «Чайандатааҕы НГКМ — Благовещенскай» хайысхаҕа 2 000 км, ол иһигэр 1 350 км Саха сиргэр «Ковыкта — Чайанда» учаастакка тиксэр. Бу Иркутскайдааҕы уонна Саха сиринээҕи гааһы хостуур кииннэри холбуоҕа.

«Чайандатааҕы ниэптээх сир — Благовещенск» учаастагы бастаан утаа тутуохтара. 2018 сыл бүтүүтэ бу учаастакка тутуллубут турба үлэҕэ киириэхтээх.