«Россияҕа да, Кытайга да бу - баараҕай барайыак. Чуолаан Саха сиригэр дьайыытын туһунан этэр буоллахха, бырайыак энергиянан эрэллээхтик хааччыйыаҕа, гаастааһыны саҥа таһымҥа таһаарыаҕа. Бырайыак чэрчитинэн гааһы переработкалыыр уонна газохимическэй комплекстары тутуохтара, үлэ элбэх миэстэтэ тахсарын, олорор дьиэ, социальнай эбийиэктэр тутуллалларын туһунан этэ да барыллыбат», - диэтэ Алексей Миллер.

Бырайыагы бэлэмнииргэ Саха сирин баһылыгын эбээһинэһин быстах кэмҥэ толорооччу Егор Борисов салайааччылаах өрөспүүбүлүкэ салалтатын кытта үлэ улахан көдьүүстээх буолбутугар кини тохтоото. «Бырайыагы олоххо киллэрии саҕаламмытыгар биһиги хардарыта дьайсыыбыт өссө ордук күүһүрүөҕэ», - диэтэ кини.

 Владимир Путин газопровод бастакы сүһүөҕүн ууруу үөрүүлээх тэрээһинин иннинэ Уһук Илини сайыннарыы боппуруостарыгар анаммыт мунньаҕы ыыппыта. Онно кини дойду бөдөҥ комапнаияларыгар туһаайан олохтоох университеттары өйүүллэригэр эппитэ. Алексей Миллер   «Газпром» кадырдары бэлэмнииргэ бэйэтин кылаатын киллэриэҕин ыйда.

Алексей Миллер Владимир Путины кытта «Сибиир күүһэ» газ турбатын тардыы саҕаланыытыгар сырыттылар.

"Сибиир күүһэ" билигин үлэлии турар Илин Сибиир - Чуумпу акыйаан газ магистральнай турбатын батыһа тардыллыаҕа. Онон, инфраструктураҕа уонна энергияны харыстааһыҥҥа үп-харчы биллэ кэмчилэниэҕэ. Газопровод уопсай уһуна 4 тыһ. км (Саха сирэ - Хабаровскай - Владивосток - 3200 км, Иркутскай уобалас - Якутия — быһа холуйан 800 км). Газ турбатын кыамтата - сылга 61 млрд куб. м газ.