Семинарга СӨ баһылыгын дьаһалтатын солбуйааччы Виктор Омуков, олохтоох салайыныы тэрээһин уонна быраап боппуруостарынан дьарыктанар департамент отделын салайааччыта Татьяна Максимова, Ньурба улууһун баһылыга Борис Попов кытыннылар.

"Семинар бастакы күнүгэр олохтоох салайыныы боппуруостарыгар анаммыт үөрэх-семинар буолла. Семинар боппуростарга араарыллан ыытылынна. Манна өрөспүүбүлүкэ биэдэмистибэлэрин үлэһиттэрэ кытыннылар", - диэтилэр дьаһалтаҕа.

Сир-уот социальнай-экономическай сайдыытын стратегическай былаанын, сир сокуоннарыгар уларыйыылар, нэһилиэнньэни муниципальнай салайыыга тардыы, о.д.а. тустарынан ырыттылар.

Семинарга «РФ государственнай былааһын сокуону оҥорор (бэрэстэбиитэллээх) уорганын тэрийии сүрүн принцыптарын туһунан» федеральнай сокун 26.3 ыстатыйатыгар уларытыылары киллэриини ырыттылар. ЯГСХА юридическай факультетын сэбиэдиссэйэ, юридическай наука доктора Егор Пахомов маныаха сүрүн иһитиннэриини оҥордо.

Семинар иккис күнүгэр баһылыктар спартакиадалара буолла. Кинилэр спорт алта көрүҥэр күрэхтэстилэр. Оннук, хапсаҕайга Үөһээ-Бүлүү хамаандата тэҥнээҕин булбата. Сунтаардар волейболу бастыҥнык оонньууларын бигэргэттилэр. Пневматическай бинтиэпкэнэн ытыыга Ньурба баһылыктарын хамаандата бастыҥынан ааттанна. Оттон канааты тардыыга Бүлүүлэр инники күөҥҥэ буоллулар. Уопсай түмүккэ ньурбалар иккис сылын бастакы миэстнэи туран биэрбэтилэр. Иккис миэстэни Бүлүү хамаандата, оттон үсүһү сунтаардар ыллылар. Көһө сылдьар кубок Үөһээ-Бүлүүгэ аныгыскы семинар ыытыллар сиригэр айаннаата.