Тэрээһиҥҥэ кэлбит үөрэнээччилэр, төрөппүттэр уонна ыалдьыттар бу тула санааларын үллэһиннилэр. Оҕолор бу ырытыһыыга көхтөөхтүк кытыннылар. Оннук, 5 б кылаас үөрэнээччитэ Ирина Петрова бырайыак куоракка олус наадалааҕын тоҕо диэтэххэ, биһиги төрүппүтүн науканы уонна инновацияны кытта ыкса ситимниирин бэлиэтээтэ. "Бу бырайыагынан биһиги аан дойду таһымыгар тахсар кыахтанабыт", - диэтэ 6 а кылаас үөрэнээччитэ Дайаана Осипова. 10 а кылаас үөрэнээччитэ Алик Чупров «Олоҥхо дойдутугар» норуот духуобунай кыаҕын мунньарга этии киллэрдэ.

Парламент үөрэххэ, культураҕа уонна көрдөрөр-иһитиннэрэ тиһиктэргэ уонна уопсастыбаннай тэрилтэлэргэ сис кэмитиэтин салайааччыта Антонина Григорьева «Олоҥхо дойдута» инновационнай бырайыакка Саха сирин историята аныгы технологичнай толоруунан бэриллиэҕин туһунан эттэ.

«Бу тула элбэх санааны, этиини иһиттибит. Олоҥхо дойдутугар олорор дьиэ фонда тутулларын бырайыагы көҕүлээччилэр туруорсаллар. Ол аата, манна оҕо садтара, оскуолалар, эбии үөрэх тэрилтэлэрэ баар буолуохтара. Дьон улуустартан көһөн кэлиилэрин учуоттаан, 240 оҕоҕо анаммыт оҕо садын уонна 750 миэстэлээх оскуоланы тутуохтаахпыт. «Олоҥхо дойдута» социальнай суолтата улахан буолуохтаах, - диэтэ Антонина Григорьева.

Дьүүллэһиигэ култуура, духуобунай сайдыы миниистирэ Андрей Борисов, «Олоҥхо дойдута» бырайыагы олоххо киллэрэр дириэксийэ салайааччыта Лена Фёдорова, Айыы кыһатын дириэктэрэ Лидия Шамаева, учуонайдар, култуура деятеллэрэ, уо.д.а. кыттыыны ыллылар.Тэрээһин Айыы кыһатын өрөгөй ырыатынан уонна алыгыһынан түмүктэннэ.